韓式炸醬麵

原先的晚餐變成夜宵^-^。
老爺今日要額外返工，預計可依平日時間回到家。
但六點鬆D打比我話，要八點。
我話唔緊要啦，今晚食麵，我已經整好咗個醬，等你返來先淥麵，好快啫!
點知七點又打比我，話未走得，會夜，你吔食先。
唯有我同少爺簡單食琴晚剩下的法包及湯。
九點鐘老爺打比我話收工回家中，有無公仔麵食，我話食炸醬麵啦!
今次我用咗日式拉麵做麵底(香港製造)，唔知係唔係我過水唔夠，少爺話有D梘水味。

食譜 ﹕ 韓式炸醬配拉麵

 

材料 ﹕
豬肉粒/免治豬肉       300克
薯仔(中)                         1個
洋葱                                1個
韓式炸醬(黑醬)         150克
黃糖                            2湯匙
熱水                              適量
溫室青瓜(黃瓜)           適量 (切幼條)
拉麵 / 麵條                   適量 (依包裝指示煮熟，用作麵底)

豬肉醃料 ﹕
胡椒粉                          適量
鹽                             1/4茶匙
糖                             1/2茶匙
紹酒                         1/2茶匙

埋芡 ﹕
生粉水                          適量

做法 ﹕

 

1. 鍋內燒熱適量油，下黑醬及黃糖炒至糖溶，取起。

2. 原鍋下洋葱爆香。

  

3. 下豬肉炒勻。

  

4. 下薯仔及已爆過的醬，拌勻。

  

5. 下適量熱水，煮至薯仔淋，下少許生粉水埋芡，即成。