再戰菠蘿牛油蛋糕

昨日整的菠蘿牛油蛋糕，經幾位白鼠的報告及自己食後。修改一下食譜，決定再整多一次，皆因仲有菠蘿。

今個我攞咗返安全島，佢哋話好好食。連我自己都滿意😍

菠蘿牛油蛋糕

材料：

無鹽牛油 200g

砂糖 150g

鹽 2g

全蛋液 170g

蛋黃 1只

低筋粉 210g

鮮菠蘿蓉 40g

鮮菠蘿粒 適量

做法：

1. 無鹽牛油放置室溫，待軟身。
2. 蛋糕模鋪上牛油紙。
3. 低筋粉過篩2次。
4. 焗爐用180度先預熱10分鐘。
5. 菠蘿粒用廚紙盡量索乾水份。放在預先鋪上牛油紙的焗盆上，入焗爐焗至乾身，約15-20分鐘後取出。留意不要焗燶。不用關掉焗爐，及保持180度，留待焗蛋糕用。
6. 全蛋液及蛋黃拌勻成蛋汁。
7. 無鹽牛油用電動攪拌器，用低速打散。加入砂糖及鹽，繼續用低速打發至顏色轉淺黃及蓬鬆。
8. 分多次加入蛋汁，每次打至有阻力後，才加第二次，直至完成所有蛋液。
9. 加入半份已篩的低筋粉，用電動打蛋器用最慢速度拌勻。
10. 加入菠蘿蓉用最慢速度拌勻，取出部分麵糊，放入玄米油內拌勻，一次過倒入麵糊內，用膠刮拌勻。
11. 加入餘下的麵粉，用膠刮輕手拌勻。把菠蘿粒放進麵糊內拌勻。
12. 隨即倒入蛋糕模內，用膠刮輕手抹平後，取起蛋糕模，凳落枱上，凳多兩三次。
13. 放入焗爐，用180度焗40分鐘，蛋糕面蓋上錫紙，繼續焗多20分鐘，用竹纖或針斜插入蛋糕內取出，如沒有粉漿，再焗2分鐘，取出待10分鐘後脫模，放在架上，撕開牛油紙四邊，繼續待蛋糕全涼後，可以食進。

菠蘿牛油蛋糕

 每逢到農曆年最尾的兩三日，都會買一個菠蘿🍍，加少許裝飾，就放在家迎接新一年。

可能天氣問題，琴日見到個菠蘿已經熟透，底部開始有霉，於是快快手開咗佢，浸埋鹽水放雪櫃。浸過鹽水後，食咗一件，又甜又有菠蘿蜜香。

放工時想下，個菠蘿咁香又咁多，不如試下整菠蘿蛋糕🍍🍰，反正未整過。

焗完放涼切開，已經聞到淡淡的菠蘿香味，食落甜咗D(知道菠蘿較甜，已經減咗糖)😂

香蕉蛋糕（低醣版）

見到家中幾隻香蕉已經起晒梅花點，一心整香蕉蛋糕，秤好晒材料，撕開蕉皮，啲蕉肉實的的無香味，用义壓蓉先聞到少許蕉味🤦🏻‍♀️

點解而家啲蕉咁嘅😅

由於老爺有血糖高，近兩年已經轉用羅漢果糖煮餸。今日試吓用嚟整蛋糕，用1:1的份量代替砂糖，完成品外表沒有改變，但味道就唔同，帶唔到香味出來，睇怕都要試多幾次😂

法式洋葱湯 (雞湯版)

尼個blog有一段時間無打理過，除咗工作忙之外，其實都係懶得動。

係時候要回歸。

今日到超巿，見到澳洲洋葱，只係$10就有一袋(1KG裝)，反正小姐早兩日就話想飲洋葱湯。所以今晚煮咗個雞湯版的[法式洋葱湯]

自家食譜 ﹕法式洋葱湯 (雞湯版)

材料 ﹕4-5人份量

洋葱	1000克
清雞湯	1公升
無鹽牛油	40克
油	1/2湯匙
鹽	1/4茶匙
麵粉(all purpose)	1湯匙+1茶匙
糖	1茶匙
白餐酒	125ml
法包	4片
披薩芝士碎	適量

 

做法 ﹕

1. 洋葱去衣洗淨，切幼條，備用。

2. 湯鍋下油及牛油，開火用中細火煮至牛油溶解後，加入洋葱，轉中火炒均後，加鹽炒至洋葱軟身。(如覺得乾，水份不足加1湯匙水)

3. 湯鍋，蓋上湯蓋，轉至最細火煮50-60分鐘至洋葱全部透明狀或溶解。

4. 掀走湯鍋蓋，轉中至大火炒至洋葱收水(但不可以燒焦)。

5. 關火後立刻加入麵粉，拌勻至麵粉溶解。加入糖及白酒，開火用中慢火煮約2分鐘左右，讓酒精蒸發下。

6. 轉大火，隨即加入清雞湯，滾起後去掉湯面的浮泡及油，轉細火加蓋煮30分鐘。

7. 預熱焗爐，用200度將法包每邊焗至脆身(像多士般)，取出備用。

8. 湯煮好後，試味(我沒有再加鹽，因為已經足夠)，可加入適量胡椒粉拌勻。

9. 將湯加入4個湯盅內，各放一片法包及灑上芝士碎。入焗爐，用250度焗至芝士溶(約3-4分鐘)，即成。

香蕉戚風蛋糕

個香蕉蛋糕未食晒，老爺同小姐猛話仲兩隻香蕉，起晒梅花點，快啲整埋蛋糕啦。
老爺就想Encore香蕉蛋糕。小姐就話唔好啦，戚風蛋糕身康啲。
媽媽你整戚風蛋糕。咁尼個媽媽又應承😃

食譜 ﹕ 香蕉戚風蛋糕

尺寸 ﹕20cm 中空活動戚風蛋糕模
爐溫 ﹕175℃
時間 ﹕40分鐘

蛋黃麵糊材料：

雞蛋黃                      100克

淡味菜油                  70克

幼鹽                                                   1克

熟透香蕉肉        200克

鮮奶                                          2茶匙

低筋粉                      145克
 

蛋白霜材料 :

蛋白                                    230克

砂糖                            100克

做法：

1.   預熱焗爐。

2.   低筋粉過篩 2次，備用。

3.   香蕉肉壓成香蕉蓉，加入鮮奶拌勻，備用。

4.   蛋黃、鹽及菜油置入深碗中，用手攪打蛋棒拌勻。

5.   加入香蕉蓉拌勻。將低筋粉加入拌勻至沒有粉粒順滑，備用。

6.   蛋白打散，分2-3次，用電動打蛋器以高速打至呈現勾呈，反轉不會倒出，再轉慢

          速打多1分鐘左右，即慢慢取出打蛋器關上電源。

7.   將1/3蛋白霜加入香蕉蛋黃糊中，用手攪打蛋器輕拌勻後。全部倒入蛋白霜中，用

          膠刮輕手拌勻。

8.   快手倒入蛋糕模中，大力凳兩下。

9.   置入焗爐中上層，用175℃焗40分鐘至蛋糕熟透，用竹籤插入取出而沒有蛋漿，即

          可離爐。(如途中蛋糕已上夠色，鋪上錫紙蓋面)

10. 取出後立即倒扣蛋糕，放至涼透，脫模即可進食。

                                       

香蕉蛋糕 (無添加)

 小姐回歸後，成日都叫我整香蕉蛋糕。

佢在安全島成年，細表姐成日塗毒佢話X馬的香蕉蛋糕好好食。有一日佢真係去買嚟食，點知個蛋糕原來............... 。食過後，佢話媽媽整仲好食啦.............

最於等到我整香蕉蛋糕😂

食譜 ﹕香蕉蛋糕 (無添加)
尺寸   ﹕約22cm x 10cm (依模具摺上牛油紙)
爐溫 ﹕175℃
時間 ﹕35分鐘
材料 ﹕ 

熟透香蕉肉            150克

鮮奶                    1 ½茶匙

低筋粉                    150克

無鹽牛油                  70克

全蛋液                    180克

砂糖                          70克

幼鹽                            1克

做法：

1.    預熱焗爐。

2.    低筋粉過篩 2次，備用。

3.    無鹽牛油座溶，保持油溫70℃至90℃，備用。

4.      香蕉肉壓成香蕉蓉，加入鮮奶拌勻，備用。

5.      準備大熱水，盛熱水的器皿要大過扛蛋的器皿。

6.      全蛋液、砂糖及鹽置入器皿內，拌勻成蛋漿(拌勻就可以)，隔大熱水，用手攪

         打蛋器攪拌至蛋漿約42℃至45℃離開熱水。

7.      轉用電動打蛋器，以高速打至挺身，轉慢速打多1分鐘。

 

8.    加入香蕉蓉拌勻。將低筋粉分2-3次加入，每次用膠刮摺疊方式，輕手將粉拌

       至沒有粉粒(每次需要拌勻，才加入粉)，成香蕉蛋糊。

 

 

9.  取適量香蕉蛋糊加入熱的牛油溶液中拌勻，一次過倒回香蕉蛋糊中。

10.  用膠刮摺疊方式，輕手拌勻至蛋糊帶有光澤。快手倒入蛋糕模中，大力凳兩

       下。

           

 11.  置入焗爐中上層，用175℃焗10分鐘，取出用刀在蛋糕面界一刀，放回焗爐繼
        續焗多25分鐘至蛋糕熟透，用竹籤插入取出而沒有蛋漿，即可離爐。(如途中
        蛋糕已上夠色，鋪上錫紙蓋面)

12.     離爐後，連同蛋糕模大力凳落枱上，將蛋糕連牛油紙取出放架上，撕開四邊待   涼後進食。

菠蘿雞肉薄餅(Pizza)

大部份時間都係得我同老爺兩個食，兩個又唔食得多，每餐都係一兩款，所以唔洗諗到頭爆😂
琴晚見雪櫃仲有半包芝士碎，過往成日都唔得，實放到發霉。為免浪費，用嚟整pizza。
今晚一個pizza + 煙三文魚沙律，又攪掂一餐😀😁
今次焗pizza時，加埋塊熱石板，效果真係唔同d

 

  

芒果蛋糕卷

上星期六買咗三個大大個芒果。
星期日用咗一個整布甸。
到星期三(1/7)假期，無返安全島又無周圍去，留家無無聊搵野消磨時間。
除煲劇外，最好就做 '亞茂' 整餅。
試下一次過焗兩底蛋餅，但失敗了。除焗的時間外(因為我分上、下層焗，時間未能掌握)，又可能用蛋糊時，份量出咗問題(因為嚐試用自已口味改變)。成品出來較濕。我要試到為止。
為咗消滅埋最後一個芒果，今日再戰蛋糕卷，先做一底，份量稍作調節。今次OK啦，蛋糕體唔濕，口感鬆軟。
YEAH! 同事明又有下午茶。