菠蘿牛油蛋糕

 每逢到農曆年最尾的兩三日，都會買一個菠蘿🍍，加少許裝飾，就放在家迎接新一年。

可能天氣問題，琴日見到個菠蘿已經熟透，底部開始有霉，於是快快手開咗佢，浸埋鹽水放雪櫃。浸過鹽水後，食咗一件，又甜又有菠蘿蜜香。

放工時想下，個菠蘿咁香又咁多，不如試下整菠蘿蛋糕🍍🍰，反正未整過。

焗完放涼切開，已經聞到淡淡的菠蘿香味，食落甜咗D(知道菠蘿較甜，已經減咗糖)😂

醬燒雞下腿

好努力下，冷宮的凍肉比我清咗接近九成💪💪，今個周未或周日又可以去上貨。

前晚攞咗包雞下腿放在雪櫃普通格解凍，跟著琴日放工準備晚餐時一併醃定。分開咗兩包，一包放入冷宮，另一包放普通格，留待今日做晚餐。

大少回來時，問我今晚食咩? 我話有尼個焗雞下腿、菜飯同節瓜粟米羮。大少話你不如加多隻燶邊太陽蛋比我。

自家食譜 : 醬燒雞下腿(氣炸鍋)

材料 ﹕

雞下腿    1000克(約11-12隻)

蜜糖      適量 (燒野食用那種)

醃料 ﹕

紹酒      1湯匙

胡椒粉    少許

原味蒜粉  ½茶匙

义燒醬    2湯匙

柱侯醬    2湯匙 

做法 ﹕

1. 雞腿解凍後，用淡鹽水浸20分鐘，抹乾水份。

2. 將雞腿放入食物器皿中，先將醃料內的紹酒加入拌勻後，加入胡椒粉及蒜粉拌勻，之用义將每隻雞腿刺下，以便入味。再將义燒醬及柱侯醬加入拌勻，再用义將每隻雞腿刺下，分開每餐可食份量，放入保鮮袋內，封好口放入雪櫃，最好醃一晚。

3.焗前放室溫1小時。

4.氣炸鍋鋪上牛油紙，噴少許油，將雞腿平放好，用180度焗15分鐘，取出反轉再焗7分鐘，用义刺下無血水出，就掃上蜜糖，再焗2分鐘即成。

同場加映 : 燶邊太陽蛋、菜飯、節瓜粟米羮

銀魚煎蛋

        自從農曆年過後，除本身工作忙外，加上小姐要籌備結婚，唔多唔少都幫下佢手，攪D鎖碎的事，再加埋自己又要睇中醫調理身體，所以一個星期都煮唔到一餐，有時成個星期都外賣或出外食。

小姐的婚禮，終於在上個月底順理完成，開始佢人生另一階段。而我又開始定下來。

因為開始煮番飯，自然就要睇下冰箱、食物櫃等等，遂一打開，先發現先前買落好多罐頭、凍肉，調味料等等，有D已經過期，揀選後有D過期係唔留得，自然去咗堆田區啦，有D寫最佳食用期的，我已經放咗出嚟，要盡快KO佢地。

    

自家食譜 ﹕銀魚煎蛋

材料 ﹕		醃料 ﹕
急凍銀魚(200G)	1包	紹酒	1/2茶匙
雞蛋	3只	胡椒粉	少許
葱	2條
		調味 ﹕
		鹽	1/2茶匙

 

做法 ﹕

1. 銀魚解凍後，沖洗乾淨，抹乾水份，加入醃料拌勻，備用。

2. 葱除去根部及表面的衣，洗淨切粒。

3. 雞蛋打入深碗中，加入調味，打勻成蛋液。

4. 把銀魚及葱放入蛋液中，拌勻。

  

5. 熱鑊下油，油熱後加入蛋液，用中火慢煎蛋液凝固至9成熟後反轉，再煎至全熟，即成。

髮菜腐皮卷(新豬肉)

自從暑假尾開始，已經無寫BLOG一段時間，而家大有點時間，開始補番之前的食譜。

這個腐皮卷用料簡單，又易做。

 

食譜 ﹕ 髮菜腐皮卷 (新豬肉)

 

材料 ﹕

新豬肉                  1包

腐皮                      1張

髮菜                    少許

白菜仔              300克 (或其他菜)
薑                          1片

調味 ﹕ 

素食蠔油         1茶匙

老抽              1/2茶匙

冬菇粉             1茶匙

清水              1/2碗

獻汁 ﹕

生粉水               適量 (後下)

做法 ﹕

1. 髮菜置入碗中，加入過面水及滴油，浸軟身後，洗淨隔水份，備用。

2. 新豬肉解凍後，剪開包裝袋，全部放入碗中，平均分成8份，備用。

3. 腐皮攤開放平，沾濕一張廚房紙(不用太濕，否則腐皮會穿破)，把腐皮抹一抺，令腐皮稍為軟身，平均剪成8塊。

4. 每塊腐皮放上一份新豬肉，包好，用生枌水封口。

5. 洗淨白菜仔，備用。

6. 燒熱少許油，放入腐皮卷，把兩面煎至黃金色，取起。

7. 原鍋，加入少許油，爆香薑片，下白菜仔及少許鹽炒至軟身。 加入調味料(落鍋前先拌勻)及髮菜煮至滾起。

8. 鋪上腐皮卷，埋獻即成，原鍋上桌。

美國桶蠔豆腐煲

熱起嚟，我就無心機煮食。所以近排真係少煮，就算煮都係簡簡單單，唔好攪到個人都熱埋。
又嚟一煲過，加個上湯肉片伊麵算數。

食譜 ﹕美國桶蠔豆腐煲

材料 ﹕

美國桶蠔              1杯

百福板豆腐          1盒

葱                          2棵（切短度）

薑                          5片

蒜茸                  1茶匙

紹酒               1/2湯匙

醃料：

胡椒粉                少許

生粉                  1茶匙

調味料：

蠔油                  2茶匙

生抽                  1茶匙

老抽                  1茶匙

糖                   1/2茶匙

生粉                  1茶匙

水                      4湯匙

做法：

1. 將蠔放入筲箕中，加兩湯匙生粉輕輕拌勻，靜置10分鐘。

2. 注入清水在深碗中，將蠔放入，用浸洗方法幾次，水清就可，不要用水沖洗，免沖爛蠔身。隔水備用。
3. 熱滾適量水，將蠔放入，水再滾起時，即取出。抹乾水分，加入醃料拌勻，備用。
4. 豆腐切件，抺乾水份，煎至兩面金黃，盛起備用。
5. 原鍋下少許油，爆香薑片、葱白及蒜茸，灒入紹酒，將調味加入（調味料不用拌勻，留起碗底的生粉沉澱，作埋芡用）。
6. 除即加入豆腐及蠔，蓋上蓋焗2分鐘，埋芡及加入葱段，即成。

滑蛋蒸花蟹、凍蟹

滑蛋蒸花蟹

凍蟹

大姑爺知我今個星期返安全島，特意留咗兩斤幾蟹，待我回來煮，四隻蟹在漁船養到我確實回島，先從船送到街巿取貨。
見姑爺咁有心，所以我都好用心整今晚的晚餐。
尼四隻藍花蟹，兩隻整配蛋蒸，兩隻整凍蟹。

食譜 ﹕ 滑蛋蒸花蟹

材料 ﹕
花蟹              2隻
雞蛋              6隻 (300克)
(按個人喜歡，今次我用日本蛋)
清雞湯(或清水)及蒸蟹水     450(雞蛋 1 : 水 1.5) 
葱粒             1湯匙

做法 ﹕
1. 蟹取回來，用冰及水浸片刻(待蟹暈了)，劏開去走肺等等。
    (如不懂劏蟹，就請檔主處理)
2. 雞蛋打散，備用。
3. 洗淨放蒸碟上，水滾放入，大火蒸10分鐘。
4. 取出隔起蒸蟹汁，如不足450克(即蛋液的1.5倍)加入清雞湯(或清水)，與蛋液拌勻，隔篩注入蟹中，蟹蓋取走。
5. 水滾計，大火蒸12分鐘，加回蟹蓋，晒上葱粒，即成。

食譜 ﹕凍蟹
材料 ﹕
花蟹              2隻
喼汁            適量 (沾蟹食)
蒜茸白醋    適量 (蒜茸、白醋，少許糖拌勻)


做法 ﹕
1. 蟹取回來，用冰及水浸片刻(待蟹暈了)，洗乾淨。
2. 隔水(水滾，大火)蒸15分鐘。
3. 取出，清走蒸出來的雜物(唔知係唔係蟹的血，有D白色有D灰灰地色，似膏狀物體)，及剪走咸水草或尼龍草。
4. 放入雪櫃(普通格)雪2-3小時，即可食用。

涼拌車厘茄豆腐

裝修加上疫情關係，差不多半年無去做Facial。
最後自己都頂唔順，在星期一去做番一次，做完個樣都唔同😄
做完路經鵝頸橋附近的街巿，見到一包包的串串茄，18元有兩包，每包都有成12粒，平時在自己家附近的街巿都要18-20元包，於是買咗兩包試下。
簡簡單單用嚟做個涼拌菜，都唔錯喎! 又甜又香😋
好合適現時又濕又熱的天氣食用👍

食譜 ﹕ 涼拌車厘茄豆腐

材料 ﹕
蒸煮豆腐             1盒
車厘茄               適量
日式芝麻醬       適量

做法 ﹕
1. 預先將豆腐脫盒後，放碟上，用熱水輕輕沖洗。(或隔熱水蒸3分鐘)。置雪櫃雪至臨食前，取出倒去水及用廚紙索乾水份。
2. 車厘茄用凍食水洗淨，抹乾水份及切開兩邊。
3. 將車厘茄放在豆腐邊，淋上醬汁，即可食用。

雞哈豆腐

我從來無煮過這個餸，還記當年朋友在群組上載這菜式時，我仲話咩丫，未"麻婆豆腐"，點解叫"雞哈豆腐"。朋友話都係川菜，大致差不多，不過最後會放雞蛋。
今日想唔到食咩餸，而大少琴晚已經話你整可以送飯的餸。最初我都係想整"麻婆豆腐"，最後都係試咗尼個。

食譜 ﹕ 雞哈豆腐

材料 ﹕

免治豬肉        300克

豆腐                    1件

蒜茸                1茶匙

薑茸                1茶匙

蛋                        1隻(打散)

豆瓣醬            1湯匙

醃料 ﹕

生粉                1茶匙

水                    1茶匙

油                    1茶匙

調味料 ﹕

生抽                1湯匙

老抽             1/2湯匙

黃糖                1湯匙

鹽                 1/4茶匙

雞粉                1茶匙

水                 1/2碗

做法 ﹕

1. 豬肉加醃料拌勻，最少醃20分鐘。

2. 豆腐切粒，飛水2-3分鐘，盛起備用。

3. 燒熱適量油，下蒜茸及薑茸爆香，下豆瓣醬，加入肉碎炒勻。

4. 把調味料加入，煮滾後，加入豆腐煮至汁濃稠(如汁液太稀，可加入少許生粉水)，將蛋液加入拌勻，即成。

蒸水蛋

埋位食飯時，大少話你今晚食晒人地全家。
哈哈! 的確是，又豉油雞又蒸蛋，仲唔係食晒雞全家。

食譜 ﹕ 蒸水蛋

材料 ﹕ 

雞蛋            3隻(去売後，約150克)

凍滾水    225克(比例是 1份蛋、1.5份水)

調味 ﹕

鹽         1/4茶匙

雞粉     1/2茶匙

做法 ﹕

1. 凍滾水加調味拌勻，備用。

2. 雞蛋打散後，加入已調味的水，拌勻。

3. 隔篩置碟中。置蒸爐用90度蒸12分鐘。即成。

4. 如沒有蒸爐。水滾後，置蒸鍋中，鍋蓋抹乾水份，蓋上鍋蓋，不用全蓋上，留少少隙(即八分蓋)，用中慢火蒸約12分鐘，用牙籤插在中間，牙籤可企隱不倒，即成。

用鍋蒸蛋時，我不會蓋上任錫紙或保鮮紙，完成後，蛋面沒有水份。其中一個要點是，放入鍋加蓋時，記緊要抹乾鍋蓋的倒汗水。

   

氣炸鍋炸燕麥豆腐

雪櫃有盒就黎到期的煎炸豆腐，又有氣炸鍋，於是就黎個椒鹽豆腐，點知無炸粉同麵包糠，點算好呢.......
想想下，用燕麥用燕麥，動手啦

食譜 ﹕ 炸燕麥豆腐

材料 ﹕

煎炸豆腐        1盒(大)

雞蛋                1隻

生粉              適量

燕麥              60克

油                4茶匙

調味 ﹕

鹽               1/4茶匙

做法 ﹕

1. 豆腐離盒，切大粒，放碟上放置片刻。用廚紙索乾水份，索多幾次，要乾身。

2. 雞蛋打散，拌入調味。

3. 燕麥加入油拌勻。

4. 將豆腐依次序沾上生粉、雞蛋、燕麥。

5. 氣炸鍋先用200度預熱5分鐘。

6. 把豆腐排上煎碟上，用200度炸10分鐘，即成。除個人喜好醮甜酸雞醬、沙律醬等。