金蠔臘腸排骨煲仔飯

琴晚，大少問聽晚食咩，小姐好快話煲你😂

我話係丫，你食唔食，大少話食少少。

點知，琴晚佢夜放工，我哋食先，留番差不多兩大碗(飯連餸)。

我仲同小姐講，如果大少食唔晒，你聽日食埋佢。

小姐就話大少一定食晒

結果係清晒😃

食譜 ﹕ 金蠔臘腸排骨煲仔飯

材料 ﹕

腩排(急凍)    480克

臘腸                   2條

金蠔                   8只

薑絲                1湯匙 (蒸金蠔)

蒜蓉                1湯匙

白米                   2杯

水                       2杯      

醃料(排骨) ﹕

胡椒粉             少許

紹酒               1茶匙

鹽                1/2茶匙

糖                   1茶匙

生抽               1茶匙

蠔油               1茶匙

生粉               2湯匙

麻油                 少許 (放飯面前落)

金蠔(處理用料) ﹕

胡椒粉          1茶匙

紹酒              2茶匙

做法 ﹕

1. 處理金蠔 ﹕先解凍(不要浸水)，沖洗乾淨，抹乾水份，加入胡椒粉醃片10分鐘左右。燒油少許油，加入金蠔炒一炒，灒入紹酒，炒一炒取出，備用。

2. 腩排澈底解凍，用1茶匙鹽拌勻，靜置20分鐘。用水沖洗至沒有血水，抹乾水份，依次序加入醃料 _ 胡椒粉拌勻、紹酒拌勻、鹽 + 糖拌勻、生抽 + 蠔油拌勻 、生粉拌勻，醃20-30分鐘，麻油拌勻(放飯面前加)

3. 臘腸用熱水淥一淥(以便沖洗表面的油份及污垢)，撕走腸衣(我習慣唔要)，切開小段。

4. 洗淨米後連同水一併放進煲內，鋪上臘腸，用大火煲約1分鐘後，用筷子攪拌下，加蓋轉細火煲5-6分鐘。

5. 鋪上排骨及金蠔，薑絲放金蠔上。開火用細火煲12分鐘。關火焗5分即成。隨意加入煲仔飯豉油，即可進食。

沙鍋雲吞雞 (Staub鑄鐵鍋)

原先想好幾道菜式打算今日做冬，但小姐話冬至個日都凍，不如打邊爐? 我話唔好啦🙅佢想咗一陣，就話不如食沙鍋雲吞雞。我想都無想就👌 話晒食落都暖粒粒

琴日已經買晒材料，今日放工立刻準備。

材料 ﹕

冰鮮雞                 1隻

乾瑤柱                 2粒

金華火腿           20克

娃娃菜                 2棵

餃子                   適量 (數量隨個人喜歡，自己包或買現成)

跑活水材料 ﹕

薑                        2片(厚少少)

葱                        1條

紹酒             1/2湯匙 

做法 ﹕

1.    冰鮮雞原袋解凍後，拆開包裝袋(不用清洗)，把雞放入器皿中加入1湯匙鹽捽勻全身(包括雞腔內)，靜置20分鐘。

2.    乾瑤柱洗淨，用過面水浸片刻。

3.    娃娃菜洗淨，切塊。

4.    把雞內臟及血塊清除，將雞洗乾淨，抹乾水份。

5. 切走雞頭及尾，起出原隻雞肶及雞翼，備用。

6. 斬出雞腳，剪走腳胛。雞脛部份開始起走皮及肥膏，將雞売切開兩份。

7.    把全部雞、金華火腿及跑活水材料，全部放入鑊中，加入過面水，用中慢火煲至水將大滾而面已浮出雜質，取出雞件及金華火腿，用水沖洗，備用。

8.    鍋中注入10碗水(我用Staub比較鎖水，如其他要多加2碗)，除雞翼及雞肶外，全部雞件、金華火腿、乾瑤柱連同浸瑤柱水及半份娃娃菜加入，用大火煲滾，加上鍋蓋，轉慢火煲1小時。

9.    關火，取出金華火腿、雞売、雞脛及腳。隔走湯上的油。

 

10.     開大火將湯煮滾，放入雞肶、雞翼及餘下的娃娃菜，繼續用大火將湯煮滾後，加蓋及關火。浸30分鐘。

11.    將金華火腿切碎，撕出雞売的肉。

12.    30分鐘後打開鍋蓋，先取起雞肶及雞翼，把雞肉放進，再放回雞肶及雞翼在面，開最細的火，把湯煮熱(保持至餃子煮熟才關火)。

13.    另一邊，煮熱一鍋水，把餃子煮熟。加入雞湯上，將金華火腿放上，即可原鍋上桌。

海龍海馬燉咸瘦肉

某日，行經老爺表姐的海味店，表姐一見我哋就必定吹下水，天南地北都傾一餐，包括大家的仔女都講下咁。

早前她知亞女口腔發炎的問題，現在有沒有改善。我話好一排又嚟過囉。

佢話，當日同你傾計後，佢朋友話，點解唔叫佢燉海龍海馬丫?

用海龍海馬加鹹瘦肉燉嚟飲，飲一排啦!

於是，就順便在表姐店用好便宜的價錢買咗啲海龍海馬。

其實已經買咗一段時間，因為當時小姐還在安全島，傭傭姐姐又比較...........，所以一路都無燉過。

現在小姐回歸，就要燉比佢飲吓。

佢飲完，話好好飲👍

食譜 ﹕ 海龍海馬燉鹹瘦肉

材料 ﹕

海龍                   1對

海馬                   1對

瑤柱                   2粒 (用1碗水浸)

南北杏        1/2湯匙

果皮                   1角

蜜棗                   1粒

瘦肉 /豬展     200克

鹽                   2茶匙

熱水                  適量        

做法 ﹕

1.  預早醃定咸瘦肉。瘦肉買回來，不用清洗，切開細件，用2茶匙鹽醃上6小時以上，或隔晚。

2.  乾瑤柱洗淨，用一碗水浸軟。(我隔晚準備咸瘦肉同埋乾瑤柱)

3.  果皮浸軟，刮去瓤，備用。

4.  海龍、海馬、南北杏及蜜棗洗淨，備用。

5.  咸瘦水，放入煲中，加入過面水，用中火煲至將滾，而水面已浮出好多白色細泡，即關火及用水清洗(此為跑活水)。

6.  將已跑過活水的咸瘦肉、海龍、海馬、瑤柱(水留用)、南北杏及蜜棗放入燉盅內。

7.  將浸瑤柱的水及果皮置煲中，煲滾後，放入燉盅內，再加入適量的熱水(大約1/2碗)，過料面就可以。

8.  蓋上燉盅蓋，置入蒸爐內，用100度燉2小時30分鐘。即成可飲用。(如用明火，鍋中注入清水，蒸架上放上燉盅，用大火煲滾水後，轉中慢火燉2小時，其間加熱在鍋中)

備註 ﹕

1. 海龍為傳統治療淋巴問題及消散腫瘤。

2. 海馬具有「補腎壯陽、散淤消腫、消炎止痛、活血祛瘀」等作用。

3. 經常飲用有助舒緩淋巴問題，慣性淋巴發炎，散結排毒，對改善神經系統問題亦有幫助。

4. 咸瘦肉有降虛火作用。

鮑魚雞粒荷葉飯

 真係<疫情嚴重，乖乖在家煮>

由小姐回歸後，晚餐有時都花下心思，攪到大少都耐不耐食(佢仍然減肥中😂)

每逢星期日就要想定未來七日，晚餐食咩野，然後通知小姐同大少(最主要係大少，小姐仲係WFH)，邊日食邊日唔食，等我預備材料。

食譜 ﹕ 鮑魚雞粒荷葉飯

材料 ﹕

冬菇                 2隻 

乾瑤柱             2粒 

蝦乾          15-20隻

雞胸肉             1件

薑                     1片 

罐頭鮑魚         1罐 (今次有10隻，隨意)

白米或珍珠米 2杯

水                     2杯 (我用回浸冬菇、瑤柱及蝦乾的水，不足才加清水)

乾荷葉             2塊

紹酒              1茶匙

醃料 ﹕

胡椒粉            少許

雞粉             1茶匙

調味 ﹕ 

老抽            1茶匙

鮑魚汁          適量

做法 ﹕

1. 隔晚或早上預先分別將乾瑤柱及冬菇洗淨，用過面水浸至軟身。

2. 冬菇浸軟後，留起浸冬菇水，冬菇擠乾水份，切粒備用。

3. 瑤柱浸軟後，留起浸瑤柱水，將瑤柱撕成絲，備用。

4. 蝦乾洗淨，用過面水浸10-15分鐘，留水取起蝦乾，備用。

5. 雞胸肉解凍後，先不用清洗，放入碗中，加入約1茶匙鹽擦勻肉身，靜置10-15分，用水清洗，抹乾水份切粒，加入醃料醃15分鐘左右。薑片切粒，備用。

6 . 白米洗淨，加入冬菇、瑤柱及蝦乾的水(依平日煮飯的水份，不足加入清水)全部放入飯煲內，將飯煮熟，關掉電源焗10-15分鐘，拌勻成有味飯，備用。

7. 荷葉用暖水浸軟後，清洗乾淨，放在器皿上(可隔水蒸)，備用。

  

8. 燒熱鑊及油，下雞肉煎至兩面轉色，灒下紹酒兜勻後，加入調味的老抽炒勻關火，雞肉留鑊中。

9.  將有味飯全部放入鑊中，開火後，遂少加入鮑魚汁炒勻，每次加入要炒勻再加，加至合自己味，即可關火。

10. 將炒好的飯放在荷葉上，包好。

 

11.  將包好的荷葉飯放入蒸隔上，鮑魚放入碗中，一併用飯煲蒸至飯煲出蒸氣及嗅到荷葉味，可取出。打開荷葉鋪上鮑魚即成。

土魷馬蹄蒸肉餅 (Miele)

有兩餸好耐無食過，分別是土魷蒸肉餅同清蒸桂花魚，於是今就一門四傑(蒸飯、蒸肉餅、蒸魚、蒸菜)放晒入蒸爐，攪掂一餐😂

食譜 : 土魷蒸肉餅

材料 ﹕ 

免治豬肉                      300克

 (我用西班牙免治豬肉，一包剛好。或用新鮮 : 瘦肉6兩、肥肉2兩，自己剁)

土魷                                  1隻 (今次比較大隻，約50克)

馬蹄                                  6粒 (預多一至兩粒，有時去皮後裏爛)

醃料 ﹕ 

胡椒粉               少許

紹酒              1/4茶匙

調味 ﹕ (1)

胡椒粉             少許

鹽                1/4茶匙

糖                   1茶匙

生抽               1茶匙

蠔油               1茶匙

紹酒               1茶匙

調味 : (2)

燕麥               3湯匙

水                   1湯匙

調味 : (3)

油                   1茶匙

做法 ﹕

1. 土魷洗淨，用清水浸至軟身。去衣及軟骨後切粒，加入醃料拌勻，備用。

2. 馬蹄去皮，用刀拍開，再刴成細粒，備用。

3. 免治豬肉洗淨，置入深碗中，加入土魷及調味(1)拌勻。

4. 加入馬蹄及調味(2)，順一方向攪至燕麥溶入肉餅中，最後加入調味(3)拌勻。

5. 轉入蒸碟上，輕輕抹平，放入蒸爐用100度蒸20分鐘，即成。(如用明火，水滾用大火蒸20分鐘)