黑椒醬牛柳炒扁意粉

上星期，老爺返緊工時打比我。
老爺 ﹕ 喂 ! 有個煲好正，夠深。用慢煮神棒時arm晒👻😁，買比你好唔好?
我 ﹕ 吓 🤔
佢話 ﹕  公司樓下，有間食品批發公司開倉。有煲同埋好多嘢買，我影比你睇................
我 ﹕ 真係好多野喎，你買牛柳、斧頭扒、西班牙火腿..........，隨即我都whatsapp比小姐。小姐第一時間話要忌廉、芝士..........等。等佢自己同老爺溝通。
晚上，老爺返來，陰公豬抽咁多野返來。佢話有D仲係公司雪櫃，聽日先攞返嚟!
當晚佢攞咗牛柳番嚟。我打開，話點解成條(起碼成2-3kg)，唔係已經切好咩? 為有自己切開一份一份，放冰格。少爺見到話，不如即刻煎件嚟食。
就咁用少少鹽同黑椒粉煎，肉質又OK喎!
今日用咗一塊嚟炒扁意粉。扁意粉都係老爺在同一間公司買回來。

少爺埋位時話，你今晚整乾炒牛河，炒意粉變河粉😅

食譜 ﹕ 黑椒醬牛柳炒扁意粉

材料 ﹕

牛柳                   1塊 (約200克)

洋葱                   1個

黑椒醬            3湯匙 (方便醬，按自己口味加減)

意粉                200克 (大約2人份量，我家比較食得少)

老抽                   少許(可不加，調色用)

做法 ﹕

1. 牛柳解凍後，用廚房紙索乾水份，切粗條。

2. 意粉，依包裝指示灼熟，備用。

3. 熱油鑊，下洋葱炒香，下少許鹽炒至洋葱合自己的口感。

4. 加入牛柳，炒至8成熟。

 

5. 下黑椒醬炒均，加入意粉及少許老抽炒勻，即成。