粉葛老桑枝蠔豉湯

早前在網上買咗兩款去濕湯料及去濕茶包，每包份量十足，好合適一家四口飲用，尤其現時的天氣，另加些配料，就可以煲，非常方便。

包裝內有 ﹕ 老桑枝、抱心茯神、赤小豆，南扁豆

另外加入 ﹕ 粉葛、紅蘿蔔、蠔豉、陳皮、椰棗

加適量清水煲2小時，加調味，即成。

無錫骨

香港的疫情，又進入另一階段，雖然大部分是輸入個案。但亦擔心那些隱形帶菌者。所以出外都要格外小心，回家真是要洗手洗手。
上星期有晚，老爺突然問我，你有無儲多少少凍肉，keep住有兩星期就ok，唔洗keep好多。我問佢，點解咁問? 佢話而家個個國家都封關，少不免運輸方面都有影響。同時物價只會上漲。叫你keep住有兩星期(兩星期就可以)，以防萬一啫。有咩嘢事，你實唔夠人搶。
我家的冰箱，一路都儲開(豬、牛、雞、魚及少許海產)，總知，我食到最後那款的肉，先會補充返同款的肉。

食譜 ﹕ 無錫骨

材料 ﹕

一字骨(急凍)        500克

八角                          1粒

桂皮                          1片

葱                              2條

薑                              2片

紹酒                   1/2湯匙

熱水                        適量

調味 ﹕

鹽                       1/4茶匙

生抽                      1茶匙

老抽                      1茶匙

黃糖                      1茶匙

醬汁料 ﹕

片糖                      1/2磚

鎮江香醋              2茶匙

茄汁                      2湯匙

做法 ﹕

1. 排骨徹底解凍後，清洗乾淨(不停換水及洗)，直至水清為止。抹乾水份。

 

2. 燒熱少許，下排骨煎至兩金黃色。

3. 加入薑、葱、八角及桂皮，炒勻後，灒入紹酒。

4. 注入過排骨面的熱水、調味煮滾後，轉中慢火炆約40-50分鐘(視乎排骨的大細)，排骨已淋。

5. 取走薑、葱、八角及桂皮。

6. 下醬汁料兜勻，再炆至汁液濃稠即可(或炆至汁液收乾掛滿排骨，但是我會留有少許汁及會原煲上，食到尾煲內只會剩下少少汁，而且唔會咁快凍，食時仍然有溫度)。

泰式生菜包

記得的話，就會晚飯時問老爺同大少，聽晚想食咩嘢，唔記得就臨瞓前問，再唔記得就自己揸主意。
不過今晚食飯食到一半，我就記得問兩個，聽晚想食咩嘢。大少話無所謂，你問老豆。老爺開頭都話無所謂，但唔夠兩秒就話食生菜包。真係要比個LIKE佢，尼個簡直快靚正!

食譜 ﹕ 泰式生菜包

材料 ﹕

免治豬肉             300克

香茅                         1支

檸檬葉                     5塊

九層塔葉                 1棵

乾葱                          2粒

蒜茸                      1湯匙

酸柑仔                   1/2個 (泰式青檸)

唐生菜/西生菜       適量

醃料 ﹕

魚露                      1湯匙

雞粉                      1茶匙

糖                       1/2茶匙

胡椒粉                    適量  

做法 ﹕

1. 免治豬肉加入醃料，拌勻醃約20-25分鐘。

2. 香茅洗淨，取用白色部分，拍爛切幼粒，備用。

3. 檸檬葉撕走中間硬枝，捲起葉切幼絲，備用。

4. 九層塔取5-6塊(按個人喜歡)洗淨，備用。

5. 乾葱去衣，切幼條，備用。

6. 燒熱適量油，下乾葱及蒜茸爆香。

7. 下肉碎炒勻至八成熟。

8. 加入香茅及檸檬葉，炒至肉碎全熟，熄火。

9. 下九層塔(用手揸一揸)炒勻上碟，榨少許酸柑汁，即成。

鹽焗烏頭

今日見有烏頭魚買，而且都幾靚靚，於是買咗一條嚟整鹽焗烏頭，如果用嚟蒸的話，老爺同大少都唔多LIKE。反而用嚟鹽焗，大少就食半條，佢仲話下次整潮式個款。果然係潮州仔(哈哈)

食譜 ﹕ 鹽焗烏頭

 

材料 ﹕ 
烏頭魚        1條
班蘭葉     2-3塊
香茅            2支 
檸檬葉     4-5塊
蛋白            2只
粗鹽            1碗
酸柑仔        1個(泰式青檸)
錫紙            1張

做法 ﹕
1. 烏頭魚劏好，不用去麟，洗淨抹乾水份，備用。
2. 香茅洗淨，拍一拍開。
3. 檸檬葉洗淨，撕走中間的硬枝，稍為用手渣一渣。
4. 班蘭葉切去頭較硬的部分，尾部修剪，洗淨，備用。

5. 蛋白打散，與粗鹽拌勻，備用。

6. 錫紙上，先鋪一層鹽，放上烏頭魚，將香茅及檸檬葉放進肚內。

7. 用班蘭葉捲實魚肚範圍。

8. 把餘下的鹽，封蓋魚身。

9. 包好。

10. 放進已預熱的焗爐內，用200度焗約30-35分鐘，即成。

      取出剪開錫紙及班蘭葉，撕走魚麟，搾少少酸柑仔汁拌食。

懷舊雞蛋糕

年幼時，家中收到嫁喜餅，我只選雞蛋糕同合桃酥，其他的no no no...............
還記得那時的雞蛋糕中有蓮蓉，同時好大個，我由面撕出來食，撕到一半就停，跟著就包番好，留給老爹食，因為我唔like蓮蓉o架..........
最近突然好想食這款蛋糕，於是試下自己焗。當然唔會加蓮蓉😜
白老鼠試食後的評語 ﹕
有些就話唔夠甜、有些就夠，有些就話細個咗..................
而自己就覺得，乾身咗D。但有些上年紀的白老鼠就話，唔乾喎，尼D蛋糕係咁。
哈哈~~~~~~~~~ 我會再試焗到自己滿意

 

 

Apple自家豉油雞翼

每逢我煮尼個豉油雞翼，小姐同大少必定食好多，同時一定要淘汁，就而家咁大個仔大個女，都不變。
我會用自家的豉油汁，尼個汁點嚟，未就係我浸玫瑰豉油雞後，儲在雪櫃的豉汁囉😄  今次加咗幾件炸豆腐。

食譜 ﹕ Apple 自家豉油雞翼

材料 ﹕

雞中翼             9隻

炸豆腐             4件

蒜頭                 2粒

薑                     1塊(厚身)

豉油雞汁         1碗

清水                 1碗

紹酒          1/2湯匙

做法 ﹕

1. 雞翼解凍後，徹底洗淨，清洗時要用少許力在兩條中間位置推出血水。抹乾水份，備用。

2. 炸豆腐用熱水浸片刻，清洗及用刀切開，一開二。

3. 蒜頭去衣，用刀拍爛。薑去皮，用刀拍爛。

 

4. 將豉油汁、清水、蒜頭及薑，置鍋中。大火煮滾後，加入紹酒及雞中翼，待再滾起時，轉中慢煮4分鐘(不用蓋上蓋)。

5. 轉大火加入豆腐煮1分鐘，同樣不用蓋上蓋。

6. 完成後，蓋上蓋焗約10-15分鐘，即成。

備註 ﹕

尼個汁，我會繼續儲起，取走薑蒜，待涼後，放回雪櫃。

蒜茸蒸排骨

其實急凍排骨用嚟蒸，都可以好美味。只是溶夠雪同洗清血水，蒸出嚟唔會有成碟水。

食譜 ﹕ 蒜茸蒸排骨

材料 ﹕

急凍排骨粒             500克

蒜茸                         1湯匙

紅辣椒仔                     1只 (可免)

醃料 (A)

胡椒粉                        少許

紹酒                       1/2茶匙

醃料 (B)

鹽                           1/2茶匙

糖                              1茶匙

生抽                          1茶匙

蠔油                       1/2湯匙

生粉                          2湯匙

醃料 (C)

麻油                            少許 (蒸前才放)

做法 ﹕

1. 排骨粒先浸水及清洗，要邊換水邊清洗，直至排骨浸在水中攪動時，不會再出血水為止。
2. 取出隔水，備用。

3. 辣椒仔去蒂及籽，切幼粒。

4. 用廚房紙將排骨索乾水份，放入深碗中，加入醃料(A)拌勻。

5. 再將醃料(B)的鹽及糖加入拌勻後，加入生抽及蠔油及蒜茸、辣椒拌勻，才加入生粉再拌勻，醃約25分鐘。

6. 蒸前加入少許麻油，大火蒸約12-13分鐘。我用Miele蒸爐，100度12分鐘，即成。

柚子蜜慕士餅

今個星期又返安全島渡假，小姐在晚飯後，就話不如你整個慕士蛋糕。不過唔好做整綠茶(大表姐唔鍾意)、朱古力(細表姐同姑媽唔like)。咁整咩嘢味? 隔咗一陣，小姐攞咗樽柚子蜜出嚟話，整佢啦! 我話我唔想開焗爐整海綿蛋糕，用簡單的方法。
個個都話好味，但只有一位小朋友唔like