紅燒獅子頭

記得有位師姐過講，仔女大個後，仍然要回家食媽媽煮的餸，你已經嬴咗。
今次我做的獅子頭，唔用油炸(都係個句，因為開放式廚房，同時而家無工人姐姐)。改用氣炸鍋，一來唔咁多油煙，二來可以無咁油。

食譜 ﹕ 紅燒獅子頭

材料 ﹕

免治豬肉                  300克

豆腐(布包或其他)    1/2件

冬菇                              6隻

甘筍                            數片

薑                                  4片

蒜頭(我用獨子蒜)       1粒 (切片)

葱                                  1條 (切度)

紹酒                           1茶匙

白菜仔(或其他菜)      適量

醃料 ﹕

胡椒粉                        少許

五香粉                   1/2茶匙

雞粉                       1/2茶匙

黃糖                       1/2茶匙

生抽                       1/2茶匙

老抽                       1/2茶匙

蠔油                          1茶匙

麻油                            少許

生粉                          1湯匙

調味 ﹕

生抽                          1茶匙

老抽                          1茶匙

蠔油                       1/2湯匙

雞粉                          1茶匙

鹽                           1/4茶匙

糖                              2茶匙

麻油                            少許

胡椒粉                        少許

清水                          2杯

芡汁 ﹕

生粉水                         少許

做法 ﹕

1. 豆腐先用熱水沖洗，抹乾水份。與免治豬肉及醃料同放深碗內，順方向攪勻及撻至起膠。放雪櫃雪10-15分鐘。

2. 菜洗淨，備用。

3. 取出肉丸料，分4-6份(隨個人喜好，如果大粒的話，炸時要調節時間)，搓成肉圓球(我會取起一份，然後左右手，拋來拋去成圓球，目的是打走空氣，如果不懂，就咁搓圓)。

4. 將肉圓球放入氣炸鍋煎碟上，用200度炸約15分鐘至黃金色(肉圓球會出油，要中途抽出鍋，散走煙，否則會出好大煙)，取出備用。

5. 鍋內放適量油，將菜炒熟，取起備用。

6. 原鍋加少許油，將冬菇及甘筍炒香，下薑、蒜爆香後，灒紹酒，加入調味煮滾，加入肉圓球煮約10分鐘，埋芡，取起肉圓球，將菜放入，再將肉圓球放上，放上葱度，原鍋上桌。