滑蛋蒸花蟹、凍蟹

滑蛋蒸花蟹

凍蟹

大姑爺知我今個星期返安全島，特意留咗兩斤幾蟹，待我回來煮，四隻蟹在漁船養到我確實回島，先從船送到街巿取貨。
見姑爺咁有心，所以我都好用心整今晚的晚餐。
尼四隻藍花蟹，兩隻整配蛋蒸，兩隻整凍蟹。

食譜 ﹕ 滑蛋蒸花蟹

材料 ﹕
花蟹              2隻
雞蛋              6隻 (300克)
(按個人喜歡，今次我用日本蛋)
清雞湯(或清水)及蒸蟹水     450(雞蛋 1 : 水 1.5) 
葱粒             1湯匙

做法 ﹕
1. 蟹取回來，用冰及水浸片刻(待蟹暈了)，劏開去走肺等等。
    (如不懂劏蟹，就請檔主處理)
2. 雞蛋打散，備用。
3. 洗淨放蒸碟上，水滾放入，大火蒸10分鐘。
4. 取出隔起蒸蟹汁，如不足450克(即蛋液的1.5倍)加入清雞湯(或清水)，與蛋液拌勻，隔篩注入蟹中，蟹蓋取走。
5. 水滾計，大火蒸12分鐘，加回蟹蓋，晒上葱粒，即成。

食譜 ﹕凍蟹
材料 ﹕
花蟹              2隻
喼汁            適量 (沾蟹食)
蒜茸白醋    適量 (蒜茸、白醋，少許糖拌勻)


做法 ﹕
1. 蟹取回來，用冰及水浸片刻(待蟹暈了)，洗乾淨。
2. 隔水(水滾，大火)蒸15分鐘。
3. 取出，清走蒸出來的雜物(唔知係唔係蟹的血，有D白色有D灰灰地色，似膏狀物體)，及剪走咸水草或尼龍草。
4. 放入雪櫃(普通格)雪2-3小時，即可食用。

海南雞

早兩三個星期，姑爺已經叫我整海南雞，跟著在今個星期三在群組又再提。點解會咁，原因係整過兩次比佢食，佢食過番噚味囉😁
在安全島，好少即時買到三黃雞，往往要訂，今次"蘭e"(檔主)介紹我食芝麻雞，佢話好好食，又唔肥。咁唯有試下啦! 
都ok喎，真係唔係好肥，肉質都滑。

食譜 ﹕ 海南雞 (水浸法)

材料 ﹕
芝麻雞                      1只 (尼隻有2kg)
斑蘭葉                      2片
香茅                          2支
薑                              1塊 (約1/2吋厚)
薑茸                          20克 (沾雞)
蒜茸                          20克 (沾雞)
ABC豉油                 適量 (印尼店有售)
泰國青檸                   2個
紅辣椒                       1隻

雞醃料 ﹕
鹽                              2湯匙
紹酒                          2湯匙

薑茸 (沾雞) ﹕
薑茸                          20克
鹽                         1/4茶匙
熟油                          適量 (不用熱油)
將全部材料拌勻，即可。

蒜茸 (沾雞)
蒜茸                         20克
鹽                         1/8茶匙
糖                            1茶匙
泰國青檸汁            1湯匙
白醋                        1茶匙
將全部材料拌勻，試合自己口味就可以。 

做法 ﹕
1. 雞洗淨(尤其雞胸內的肺等要徹底清走)，抹乾水份。
2. 先將鹽捽勻雞內外，跟著將紹酒捽勻，同樣是雞的內外。蓋上保鮮紙，最少醃4小時。(如早上醃，視乎天氣，我不會放雪櫃，置室溫較陰涼的位)。
3. 準備一個煲，可將雞放入及水要過雞面。
4. 注入清水，要足夠蓋過雞面，將薑、香茅及班蘭葉(葉最好每條都打上結)放進水中，用大火煲滾。
5. 水滾後，手執雞頭，將雞浸入水中，大約3秒，重複三次。
6. 將雞全放進水中，水滾後，加蓋及關火。浸45分鐘。
7. 準備一盆冰水(食水)，將浸好的雞放進冰水中，碌至雞皮凍。
8. 取出放碟上，掃上適量麻油，待雞完全涼後，可斬件上碟，沾ABC醬、薑茸及蒜茸進食。

同場加插雞油飯，但是食完，先記得無影相😅

尼個飯的做法，當年我們到馬來西亞探親時，我家老爺的四嬸教我做，的確好好味。

油飯食譜唔寫住，留下次一氣呵成先。

燒春雞 ( 氣炸鍋版)

在TVMALL買牙膏，送咗兩隻春雞，size都唔細，有成1200g，隔晚將雞放下格雪櫃，一早將雞洗淨醃定先。醃時都諗住用焗爐，但最後用咗氣炸鍋。只係醃咗6-7個鐘，但味道ok喎，又多汁。只係少爺話唔夠脆。無錯有d位係唔夠，仲有隻，下次再試吓😁

 

食譜 ﹕ 氣炸燒春雞

材料 ﹕

急凍春雞         1隻(1200克)

油                     適量

蜜糖                 適量

醃料 ﹕

鹽               1/2茶匙

紹酒           1/2湯匙

生抽           1/2茶匙

老抽           1/2茶匙

做法 ﹕

1. 雞洗淨抹乾水份，在雞胸那道切開。

2. 先將鹽捽勻全勻，跟住捽紹酒、生抽及老抽。

3. 將雞平放在長碟上，不用包保鮮紙，置雪櫃中。最少要醃5小時或過夜。

4. 焗前1小時，取出置室溫(試天氣而定，冬天最少要2小時)。

5. 將雞放在氣炸鍋煎碟上，用100度焗15分鐘。

  

6. 拉出掃上適量的油在雞皮上，用120度焗10分鐘。

7. 拉出，重覆掃上油在雞皮上，用120度焗10分鐘。

8. 拉出掃蜜糖，用180度焗5分鐘，取出置碟上待5分鐘，即可進食。

韓式燉雞

多次到韓國旅行都無曾試過"安東燉雞"。反而早幾年前在銅鑼灣食過，XX奶奶燉雞。
今日突然想食，憑記憶試吓自己煮。
我要兩仔爺評分，如果五分滿分，你哋比幾多? 
大少話 ﹕ 3.5分，因為雞肉真係唔夠味，湯汁又少咗D，但係個汁就好味。
    我話 ﹕ 其實味應該夠的，係我醃唔夠時間。再醃多15分鐘就可以。
老爺話 ﹕ 好難比分喎，真係唔夠湯汁。所以唔比分
但最後個汁都有剩。尼鍋雞，粉絲會索好多湯，但係索咗D湯汁，個粉絲先係主角😂

 

食譜 ﹕ 韓式燉雞

材料 ﹕

雞扒                   2件}

雞中翼               5隻} 或用半隻雞代替

薯仔                   2個

甘筍                   1條

洋葱                   1個 

薑片                   3片

蒜片                 適量 (我用獨子蒜，用晒1大粒)

青葱                   2條

韓式辣椒醬    1/2湯匙

韓式粉絲        100克

韓式餃子            8隻 (按個人喜好，隨意可加可唔加)

醃料 ﹕

胡椒粉          少許

紹酒            1茶匙

鹽             1/4茶匙

生抽         1.5茶匙

老抽         1/2茶匙

生粉            2茶匙

油                1茶匙

調味 ﹕ 

生抽            2湯匙

蠔油         1/2湯匙

老抽         1/2茶匙

韓國粟膠    1湯匙

清水         1.5碗

做法 ﹕

1. 雞肉及雞翼徹底解凍及清洗乾淨，抹乾水分，加入醃料，醃約30分鐘。

2. 薯仔去皮切件，浸清水。

3. 甘筍及洋葱分別去皮，洗淨切件。

4. 韓式粉絲用清水浸軟(最少45分鐘)，備用。

5. 燒熱少許油，將雞較為煎至黃金色，加入薑片及蒜片炒至出味，盛起雞件，薑片及蒜片留鍋中。

6. 加入洋葱爆香，再加入薯仔、甘筍爆香後，將醃味料拌勻加入，煮滾後，轉中慢火炆10分鐘。

7. 轉大火，加入韓式辣椒醬及雞件兜勻後，排上餃子，蓋上蓋，轉中慢火炆10分鐘。(我用lock n lock個鍋，尼個鍋都比較鎖水，如果其他鍋，要留意水份的蒸發，必要時要加入清雞湯)

8. 轉大火，加入粉絲在鍋中間，煮約3分鐘左右，粉絲淋就即可(煮時用筷子鬆開粉絲，免煮至一舊舊)，晒上青葱即成。

日式放題 ﹕ 極尚大喜屋

咁耐無食過放題，見今日我同老爺都放假，一於去放肆下。

一來疫情加限聚令、二來是平日，今日到餐廳，坐起來都幾舒服，人又唔多，每枱都有膠板隔開。

排骨醬蒸三文魚扒

今晚想食三文魚扒，但唔想煎又唔想開焗爐，於是想到早前整理食物櫃時，有幾樽現成的醬，尼幾樽都是買比工人姐姐用，而家要由我自行處。於是開咗樽排骨醬，試吓蒸三文魚扒，其實都幾夾😋

食譜 ﹕ 排骨醬蒸三文魚扒

材料 ﹕

三文魚扒                    2件

排骨醬                 1.5湯匙

葱粒                          適量 (用少許熱油拌勻)

醃料 ﹕

紹酒                     1/2茶匙

胡椒粉                      適量

做法 ﹕

1.  三文魚扒解凍後，刮走魚皮上的魚鱗，沖洗乾淨，抹乾水份，將醃料塗勻魚上。

2. 再將排骨醬放魚面，放入蒸爐用100度蒸6分鐘(明火﹕水滾放，蒸5分鐘)，放上葱粒，即成。

椰菜豬肉卷

這個豬肉卷在2018年到俄羅斯旅行，在一個農莊享用過，好好味，覺得自己都可以整，於是回來後，整過一次，一D都唔難，事隔年多，又整一次，今次我利用蒸肉的汁嚟打茨，效果唔錯。大少一人秒殺4件😂

 

         今次的製成品，肉餡好滑好好味😋

                          

      2018年旅行時食            2018旅行返來，自己整

食譜 ﹕ 椰菜豬肉卷

材料 ﹕ 8件

免治豬肉              300克

椰菜葉                      8塊 (我預多2塊作後備)

蒸肉汁                   1/2碗 (蒸完肉卷後留起作調味用)

甘筍粒                   2湯匙

醃料 ﹕ (A)

胡椒粉                     少許

紹酒                    1/2茶匙

鹽                        1/4茶匙

糖                        1/2茶匙

生抽                       1茶匙

蠔油                       1茶匙

醃料 ﹕ (B)

麥片                       2湯匙

水                           1湯匙

調味 ﹕

蒸肉汁                    1/2碗

生粉                         少許   

做法 ﹕

1. 免治豬肉放碗中，加入醃料(A)順方向拌勻，再加入醃料(B)拌勻，置雪櫃雪25分鐘備用。

2. 椰菜小心撕出10塊，用熱水灼至軟身，放入凍水中再浸一浸。

 

3. 菜葉的梗，用剪刀走部分。放適量的肉餡在菜葉上，捲起。

    

4. 排放碟上，放入蒸爐用100度蒸20分鐘，取出，將肉汁倒出，作調味用。

5. 燒熱鍋，把肉汁倒進及加入甘筍粒，滾起埋茨，淋上肉卷上即成。

               

拍青瓜

一熱就熱到咁，出街仲要戴口罩，真係難頂。
大少成日話要食多D蔬菜類，為有諗下計，轉下煮的方法，見而家天氣熱，涼拌菜就合晒河車~~~~~~~~~~~~~~~
我在月初返安全島，有教工人姐姐整尼個涼拌菜，我同佢講，調味料大約係尼幾種，如果食辣的，可以加辣椒或辣油，無準則，只要你自己調教到合適的味道就可以。
我的做法，先試下青瓜，大唔大草青味，如果無，我就唔用鹽出水，咁樣青瓜就更加爽脆。

材料 ﹕

小黃瓜(青瓜)            數條

蒜茸                         2湯匙

調味 ﹕ 

鎮江醋                     5湯匙

黃糖                         2湯匙

生抽                         1茶匙

素食蠔油                 1茶匙

麻油                           少許

做法 ﹕

1. 小黃瓜洗淨切段，放入保鮮袋內，用刀拍下，每件有少許裂開(方便入味)，放雪櫃雪凍。

2. 調味料拌勻後，放雪櫃雪凍。

3. 食前一小時，調味倒入袋，與小黃瓜拌勻，醃約1小時，即成。

蟲草花淮山合桃豬展湯

正諗緊煲咩湯時，老爺突然打開冰箱話，老婆你不如聽日煲蟲草花湯，好耐無飲過，我一聽到立刻話好丫(我心諗﹕我都諗緊煲咩湯)😄😄 反正材料有齊

食譜 ﹕ 蟲草花淮山合桃豬展湯

材料 ﹕

豬展                500克(我用西班牙急凍)

蟲草花              40克(約一兩)

合桃                 1/2碗

淮山               8-10片

南北杏            2湯匙

無花果                4粒

椰棗                    2粒

清水                  10碗

做法 ﹕

1. 豬展切開幾件。跑活水，之後用水喉水沖洗乾淨。

2. 淮山洗淨後，用暖水浸15分鐘。

3. 無花果洗淨剪開兩邊，椰棗、南北杏及合桃洗淨。

4. 蟲草花洗淨，用清水浸10分鐘。

5. 煲注入清水，將材料(除蟲草花外)，全部放入，大火煲滾轉細火煲1小時30分鐘。

6. 轉大火，加入蟲草花煲滾，轉細火煲45分鐘，下鹽試味，即成。

蒸芥蘭 (Meile)

今晚一爐攪掂晒，用蒸爐 ﹕ 蒸飯、蒸排骨，跟著蒸埋菜。
簡直掂到不得了👍👍

食譜 ﹕ 蒸芥蘭

材料 ﹕

芥蘭                 400克(約10兩)

做法 ﹕

1. 芥蘭洗淨，斜刀切開。

2. 放入蒸盆上，放進蒸爐內，用100度蒸2分鐘，即成。

3. 隨意加入熟油、蠔油或豉油。我家通常唔加油，只加入少少蠔油就進食。

黃豆醬蒸排骨

係唔係年紀大，記性真係會退呢😁
一心以為雪櫃仲有酒梅子醬，可以用嚟蒸排骨，點知臨整前，先發現無😅
唯有改用黃豆醬，好彩雪櫃常備多種醬料👻

食譜 ﹕ 黃豆醬蒸排骨

材料 ﹕

急凍排骨粒          480克(約1磅)

黃豆醬               1.5湯匙

蒜茸                      2茶匙

醃料 ﹕

胡椒粉                    少許

紹酒                   1/2茶匙

鹽                       1/4茶匙

糖                       1/2茶匙

生抽                      1茶匙

生粉                      2湯匙

麻油                        少許 (蒸前先落)

做法 ﹕

1. 排骨粒用水浸解凍，期間多次換水及用手將血水排出。至水清徹，抹軟水份。

2. 將排骨放入深碗中，加入醃料(除麻油)拌勻。醃20分左右。

3. 蒸前加入麻油拌勻，轉入蒸碟上，放入蒸爐用100度蒸12分鐘，即成。(如用明火，時間相同，水滾放入，隔水蒸12分鐘)

涼拌車厘茄豆腐

裝修加上疫情關係，差不多半年無去做Facial。
最後自己都頂唔順，在星期一去做番一次，做完個樣都唔同😄
做完路經鵝頸橋附近的街巿，見到一包包的串串茄，18元有兩包，每包都有成12粒，平時在自己家附近的街巿都要18-20元包，於是買咗兩包試下。
簡簡單單用嚟做個涼拌菜，都唔錯喎! 又甜又香😋
好合適現時又濕又熱的天氣食用👍

食譜 ﹕ 涼拌車厘茄豆腐

材料 ﹕
蒸煮豆腐             1盒
車厘茄               適量
日式芝麻醬       適量

做法 ﹕
1. 預先將豆腐脫盒後，放碟上，用熱水輕輕沖洗。(或隔熱水蒸3分鐘)。置雪櫃雪至臨食前，取出倒去水及用廚紙索乾水份。
2. 車厘茄用凍食水洗淨，抹乾水份及切開兩邊。
3. 將車厘茄放在豆腐邊，淋上醬汁，即可食用。

母親節禮物

小姐知道我會返長洲渡週未，所以預先在星期五送上鮮花作母親節禮物。的確細心😍😘😘

梅菜扣肉

早排在"湯水達人"買咗d梅菜，唔知味道如何，加上冰箱仲有件五花腩，就合併做個"梅菜扣肉"。
今次用蒸爐燉咗2小時，都係未夠酥冧，遲d再試下加長時間先。味道ok o架，大少用嚟撈飯，話👍👍

食譜 ﹕ 梅菜扣肉

材料 ﹕

五花腩(連皮)           700克(最少要600克，即一斤左右)

梅菜                          160克

薑                                  3片

糖                              2湯匙(炒梅菜)

紹酒                          4湯匙

老抽                            適量(上色用)

調味 ﹕

生抽                          1湯匙

老抽                          1湯匙

糖                              1湯匙

雞粉                       1/4茶匙

清水                            2杯

做法 ﹕

1. 五花腩跑活水，完成後取出沖一沖水，不用沖至肉凍。

2. 肉還熱時，立刻用少許老抽上色，跟著拔走豬皮上的毛。

3.  用熱油，將五花腩炸至黃金色，取起抹乾油份，備用。

4. 梅菜用清水浸片刻， 揸乾水份，切粒。

5. 白鑊下薑片及梅菜炒至乾水後，加糖炒(但不要炒濃)至糖溶，下少油炒勻，灒酒。

6. 加入五花腩及調味，煮滾後轉慢火炆1小時。取起，待涼後切件。

 

6. 放少許梅菜在碗中(我用碼兜)，然後放上五花腩，再將餘下的梅菜鋪面。

7. 用錫紙蓋好，放入蒸爐內，如用明火，用中慢火蒸2約小時至肉腍，即可。我用蒸爐，需要再調節多些時間。