花甲排骨蘿蔔餃子鍋

食過早餐後，小姐話出去啦，要買奶、...............
我就話今晚想食排骨煲，要買材料，家裏無適合的食材。
先到凍肉店，原先只是買梅頭扒儲量，無意間見到包煲湯骨，幾靚而且每件骨都有肉$35.有成1KG，可以用嚟做湯底。

果然唔錯喎，啲肉都香。

食譜 ﹕ 花甲排骨蘿蔔餃子鍋

材料 ﹕

急凍煲湯骨(1包)    1000克

白蘿蔔                           2條

花甲                           600克

胡椒粒                       1湯匙

只是以上材料，個湯都好鮮甜。

以下配料，隨自己喜歡加入其他都可以。

豬肉片                         隨意 (因少爺話要食多啲肉)

餃子                             適量 (我自家包)

支竹                             適量 (我自已喜歡食)

芹菜                             適量 (隨意加唔加，我買蘿蔔時攤檔送的)

排骨跑活力料 ﹕

薑                                 2片

葱                                 2條

紹酒                             1湯匙

醃料 ﹕

鹽                                 2茶匙

做法 ﹕

1.    跑活水﹕湯骨解凍後，放入一鍋內(水要蓋過骨)，將跑活力料全部加入，開中慢火，煲至水將滾，而水面已浮出好多泡及污物，取出沖水洗淨。

 

倒走水後，沉在鑊裏的污物

2.    加入2茶匙鹽醃15-20分鐘，備用。  

3.    蘿蔔去皮，洗淨切件，胡椒粒沖洗。

4.    將蘿蔔、排骨、胡椒粒及清水(過材料面多少少，視乎煮鍋鎖不鎖水)，大火煲滾，轉慢火煲50分鐘。

5.    花甲洗淨，芹菜切段。

6.    湯差不多好前，用另一個鍋，先煮熟餃子，備用。

7.    湯滾好時，轉大火，滾起時加入花甲蓋上鍋蓋，煮5分至花甲全部打開蓋，試味(我沒有再加鹽)，將煮好的餃子鋪上湯上。

8.    用煮餃子的鍋，將豬肉片渌熟(這樣不會令排骨湯轉濁)放入，之後將其他配鋪上，再滾起時，原鍋上桌。

蟹籽墨魚滑釀雞中翼(氣炸鍋版)

經過兩晚的大餐，小姐就話今晚簡單啲。
其實我同老爺食咩都無所謂，於是摷下雪櫃有咩就煮咩(因為今日無出街)
仲有少少雞中翼、又有蟹籽、又有墨魚滑，咁就嚟個釀雞翼啦!
同場加埋個電飯煲版 _ 芝士蘑菇帶子飯
簡簡單又一餐

食譜 : 蟹籽墨魚滑釀雞中翼

材料 ﹕

雞中翼                  9隻

墨魚滑              150克

蟹籽                    適量

生粉                    適量

醃料 ﹕

胡椒粉                少許

紹酒                  1茶匙

生抽               1/2湯匙

老抽                  1茶匙

做法 

1.    雞中翼徹底解凍後，用較剪(或小刀)把雞翼起出骨。

2.    先將雞翼兩邊突出的骨切走，用較剪剪斷筋。利用剪刀沿側邊皮及骨往下剪(要貼骨邊，避免剪破雞皮)分開肉和骨。一邊用力拉出骨，用較刀輕輕輔助，就容易分開。

3.    洗淨已去皮的雞翼，抹乾水份，用醃料醃約30分鐘。

4.    墨魚滑及蟹粉放入碗中，拌勻成餡料，備用。

5.    每件雞翼放入適量的餡料(這份夠釀9隻雞中翼)，不要太多。撲上適量生粉。

6.    氣炸鍋煎碟噴上少許油，把雞翼放上，在雞翼面噴少許，氣炸鍋不用預，直接用200度炸5分鐘，反轉炸5鐘，再反轉炸多2分鐘，即成。

2020 聖誕大餐

上星期見我買開的店，有澳洲M4-5 西冷有優惠價，我買咗2kg開四件，即每有0.5kg，未煮已經滿足大少的要求😂
今晚繼續在家慶祝🎅
餐單 :
香煎西冷 (大少話尼d先係牛扒，而小姐就話好香牛味👍)
香煎鵝配法包多士(鵝肝係是訂海鮮個間，但都係唔會有番單)
魚籽醬配法包多
薯蓉西蘭花聖誕樹(有創意🎄，特意在薯蓉內加入青瓜)
香濃南瓜忌廉湯 (今次用咗日本南瓜，好似無咩分別)
白酒 (琴晚飲唔晒，今晚繼續)
今晚滿足大少同小姐的要求✌

平安夜晚餐

平安夜只是放早兩小時，加上限聚令，晚餐在家裏渡過。
今晚的海鮮由小姐sponsor，佢話今個月收到公司的rewards，任你買啦，四個人食得幾多😍
佢早兩三星期前，已經想好平安夜同聖誕夜食啲咩，佢話好想食長腳蟹同牛扒。
所以在聖誕前上網訂咗牛扒(尼間我已經幫好久，品質有保證✌)
今晚隻長腳蟹及多寶魚同一間同時是第一次上網訂幫襯，相信我唔會有第二次番單😢
算啦! 凡是都有第一次
講吓今日的晚餐 :
清蒸長腳蟹 (網上訂)
香煎多寶魚(網上訂)
氣炸雞軟骨(自家出品)
白酒(姪女送)
士多啤梨忌廉蛋糕(外購)

這隻腳是苦🙈

          
       

  

巴戟杜仲煲烏雞 (壯腰補腎湯包)

利申 ﹕我在網上睇到，自行購買的湯包，並無收受利益。
只是記錄下，是否可以番兜。
巴戟杜仲湯 (配無激素烏雞)
功效 ﹕ 壯腰、補腎、補肝、強筋骨
適合 ﹕ 腎陰虛或腰膝疼痛、十月懷胎、產後補腰固腎
湯包的材料 ﹕ 
乾包內 ﹕杜仲、巴戟、肉蓯蓉、牛膝、淮山、蜜棗、紅棗、制茨實
濕包內  ﹕ 無激素烏雞一只
湯包足一家四口飲。
同上次的魚頭湯一樣，乾包料好靚，又足料，沒有令我失望。
早一晚將隻雞放在普通格雪櫃解凍，放工立刻處理。依包裝指示，兩個鐘就有得飲，幾適合我哋在職人士。

       

        

京都骨

今日成日都天陰陰，Lunch 完出外行吓，鬆一鬆，點知一踏出校門，就下著毛毛雨，立刻返轉頭，同事話咁快返來，我話個天唔比我出去囉🙈
自從新鮮豬有問題後，我起碼成年無食新鮮豬。連冰鮮豬我都無買。起初會在凍肉店買急凍，每次只係預兩三餐，後來比我在網店搵到啲凍肉，而又係在食開的品牌，於是同同事夾單，有時同事見到邊處有好野，大家都分享下，怎至又夾單。
總知而家屋企個冰箱的凍肉(豬、牛、雞、魚)無一缺，一缺又補倉😂

食譜 ﹕ 京都骨

材料 ﹕

梅頭扒 (急凍)            3塊 (約400g)

洋葱                            1個

醃料 ﹕

胡椒粉                        少許

紹酒                          1茶匙

糖                              1湯匙

生抽                          2湯匙

老抽                       1/2茶匙

生粉                          1茶匙

油                                少許

汁料 ﹕

茄汁                          3湯匙

白醋                          1湯匙

黃糖                          1湯匙 (或普通砂糖)

老抽                          1茶匙

水                              2湯匙

做法 ﹕

1.    梅頭扒徹底解凍，用水沖洗至沒有血水，抹乾水份，每塊隨意開小件。

2.    醃肉 ﹕ 先加入胡椒粉拌勻、紹酒拌勻，靜置5分鐘，再加入其他醃料(除油外)拌勻，最後加入油拌勻，醃約30分鐘。

3.    洋葱去衣，洗淨切絲，備用。

 

4.    熱鑊下油，油熱後下豬扒，煎至兩面少許黃金色。   

5.    推開豬扒，下洋葱在中間，炒至洋葱有香味。

6.    炒至豬扒約有九成熟。

7.    將汁料先拌勻，才下加入鑊內。

8.    炒勻煮至汁液濃稠及收汁，即可上碟。

日本真鯛魚頭清潤湯

近年喜歡透過上網買凍肉、湯料。選購前，我會先睇客人評價，之後會訂最低消費(即可免費上門)試下先，如果好的我會番兜。

上星期買湯包尼間店，佢地有地鋪。我上次只是買些乾品，送來的實物都唔錯。今次就試下佢地的湯包連肉。一共買咗三套不同款，四人份量，材料足夠之外，質量都唔錯。

湯包背面，有指示。非常簡單易煲。

日本真鯛魚頭清潤湯包 : 包括湯料、真鯛魚頭一個、加拿大無激素瘦肉一包(差不多一磅)

唔洗兩個鐘就煲好。

金蠔臘腸排骨煲仔飯

琴晚，大少問聽晚食咩，小姐好快話煲你😂

我話係丫，你食唔食，大少話食少少。

點知，琴晚佢夜放工，我哋食先，留番差不多兩大碗(飯連餸)。

我仲同小姐講，如果大少食唔晒，你聽日食埋佢。

小姐就話大少一定食晒

結果係清晒😃

食譜 ﹕ 金蠔臘腸排骨煲仔飯

材料 ﹕

腩排(急凍)    480克

臘腸                   2條

金蠔                   8只

薑絲                1湯匙 (蒸金蠔)

蒜蓉                1湯匙

白米                   2杯

水                       2杯      

醃料(排骨) ﹕

胡椒粉             少許

紹酒               1茶匙

鹽                1/2茶匙

糖                   1茶匙

生抽               1茶匙

蠔油               1茶匙

生粉               2湯匙

麻油                 少許 (放飯面前落)

金蠔(處理用料) ﹕

胡椒粉          1茶匙

紹酒              2茶匙

做法 ﹕

1. 處理金蠔 ﹕先解凍(不要浸水)，沖洗乾淨，抹乾水份，加入胡椒粉醃片10分鐘左右。燒油少許油，加入金蠔炒一炒，灒入紹酒，炒一炒取出，備用。

2. 腩排澈底解凍，用1茶匙鹽拌勻，靜置20分鐘。用水沖洗至沒有血水，抹乾水份，依次序加入醃料 _ 胡椒粉拌勻、紹酒拌勻、鹽 + 糖拌勻、生抽 + 蠔油拌勻 、生粉拌勻，醃20-30分鐘，麻油拌勻(放飯面前加)

3. 臘腸用熱水淥一淥(以便沖洗表面的油份及污垢)，撕走腸衣(我習慣唔要)，切開小段。

4. 洗淨米後連同水一併放進煲內，鋪上臘腸，用大火煲約1分鐘後，用筷子攪拌下，加蓋轉細火煲5-6分鐘。

5. 鋪上排骨及金蠔，薑絲放金蠔上。開火用細火煲12分鐘。關火焗5分即成。隨意加入煲仔飯豉油，即可進食。