雞肉椰菜炒烏冬

 

自從中過Covid 後

記性真係差咗

為咗訓練下自己

唯有做啲自己鍾意嘅嘢

從新開始記錄🗒️自己煮過的餸👩🏻‍🍳

🗓️第一道🍽️

雞肉椰菜炒烏冬

材料：

雞上髀肉3塊、油揚1包（3塊）、蟹柳隨意、烏冬麵5個、椰菜半個

雞肉醃料：

- 胡椒粉少許、紹酒 1/2茶匙、生抽1茶匙

調味：

鰹魚汁1湯匙、生抽1湯匙、老抽1湯匙、味醂1湯匙、糖1茶匙

做法：

1. 雞肉徹底解凍後，用淡鹽水浸10分鐘，抹乾去皮切粗絲，用醃料醃30分鐘。

2. 將椰菜切粗條，備用。

3. 油揚沖水後，輕手揸乾水分，切條備用。

4. 蟹柳解凍後，用水輕輕沖洗，隔乾水分，備用。

5. 烏冬用水沖至散開，隔水備用。

6. 鍋下油燒熱，把椰菜炒到差不多熟盛起。

7. 原鍋加少許油燒熱，下雞肉煎至兩面變色，加入烏冬及調味拌勻。

8. 加入油揚及蟹柳拌勻，最後把椰菜倒入鍋內拌勻，即原鍋上桌。

## 油揚、蟹柳等可隨個人喜好

柚子蜜醬 (胆粗粗版)

        今早開雪櫃見到個已開好的碌柚，先想起係喎早前買嚟過年，上星期發現個柚皮已經冧冧地，已經快快手開咗。有想過整柚子沙律，但係今日又寒寒凍凍，加上老爺又唔多😷應該感冒，都係唔好過幾日先算😀

        睇電視時，見到人食麵包搽果JAM，望落好似柚子醬。就不如試下整柚子醬，反正唔整都係得一個人食，衰咗未當食咗🤣

        立刻行動。濃稠度係OK，但味道我個人認為可酸多少少，同埋有一樣失敗的，是唔記得落D檸檬皮😅

 

蜜糖牛油單骨雞翼

大少無肉不歡，今晚簡單煮魚湯米粉，只得魚的話，佢就會要求加啲丸丸又或開罐午餐肉，成日話要有實在感。盡量減少在屋企比佢食咁多加工食品。為滿足佢嘅實在感，整個雞翼佢嘆🤣

材料：

雞中翼       10隻

牛油           10克

蒜蓉         2茶匙

蜜糖         1湯匙

醃料：

胡椒粉             少許

紹酒               1茶匙

鹽                1/4茶匙

糖                   1茶匙

生抽               1茶匙

美極鮮醬油   1茶匙

老抽            1/2茶匙

生粉               1湯匙（煎前才加入）

做法：

1. 雞翼完全解凍後，用1茶匙鹽及過面水浸20分鐘，取出洗淨抹乾水分。剪或切開成單骨。

2. 把雞翼和醃料拌勻，醃約1小時。

3. 燒熱油鑊，下雞翼煎熟，取出。

4. 原鑊倒走多餘油份，下牛油及蒜蓉，待牛油完全溶解及蒜蓉稍轉色，把雞翼回鑊，快手兜幾下，關火。

5. 落蜜糖再兜幾下即成。

 

朱古力戚風蛋糕

答應整一個朱古力蛋糕給個小朋友，襯星期日有時間，立刻整定，今日早上就可以送出。

到下午，媽咪Whatsapp我 ﹕亞女放學見到就想立刻撕開個盒攞嚟食，好彩我制止到，我話你想影返個蛋糕切開個樣做記錄。影完相，一口一口咁食，我只係咗少少咋。亞女話好味，不過唔夠朱古力味(佢係朱古力精)

而我睇返切開咗的蛋糕相，我應該唔夠大力凳，因為仲有大窿窿。

我今次將個8"配方，改為6"紙盒配方。

 

櫻花蝦魚湯底龍躉肉米粉

老爺星期六開始作感冒，琴晚開始不流鼻水同打乞嗤。預佢無咩胃口，今晚索性煲粉食。買咗三條紅三魚做湯底，尼三條魚都唔平，三十大元😅

 

再戰菠蘿牛油蛋糕

昨日整的菠蘿牛油蛋糕，經幾位白鼠的報告及自己食後。修改一下食譜，決定再整多一次，皆因仲有菠蘿。

今個我攞咗返安全島，佢哋話好好食。連我自己都滿意😍

菠蘿牛油蛋糕

材料：

無鹽牛油 200g

砂糖 150g

鹽 2g

全蛋液 170g

蛋黃 1只

低筋粉 210g

鮮菠蘿蓉 40g

鮮菠蘿粒 適量

做法：

1. 無鹽牛油放置室溫，待軟身。
2. 蛋糕模鋪上牛油紙。
3. 低筋粉過篩2次。
4. 焗爐用180度先預熱10分鐘。
5. 菠蘿粒用廚紙盡量索乾水份。放在預先鋪上牛油紙的焗盆上，入焗爐焗至乾身，約15-20分鐘後取出。留意不要焗燶。不用關掉焗爐，及保持180度，留待焗蛋糕用。
6. 全蛋液及蛋黃拌勻成蛋汁。
7. 無鹽牛油用電動攪拌器，用低速打散。加入砂糖及鹽，繼續用低速打發至顏色轉淺黃及蓬鬆。
8. 分多次加入蛋汁，每次打至有阻力後，才加第二次，直至完成所有蛋液。
9. 加入半份已篩的低筋粉，用電動打蛋器用最慢速度拌勻。
10. 加入菠蘿蓉用最慢速度拌勻，取出部分麵糊，放入玄米油內拌勻，一次過倒入麵糊內，用膠刮拌勻。
11. 加入餘下的麵粉，用膠刮輕手拌勻。把菠蘿粒放進麵糊內拌勻。
12. 隨即倒入蛋糕模內，用膠刮輕手抹平後，取起蛋糕模，凳落枱上，凳多兩三次。
13. 放入焗爐，用180度焗40分鐘，蛋糕面蓋上錫紙，繼續焗多20分鐘，用竹纖或針斜插入蛋糕內取出，如沒有粉漿，再焗2分鐘，取出待10分鐘後脫模，放在架上，撕開牛油紙四邊，繼續待蛋糕全涼後，可以食進。

菠蘿牛油蛋糕

 每逢到農曆年最尾的兩三日，都會買一個菠蘿🍍，加少許裝飾，就放在家迎接新一年。

可能天氣問題，琴日見到個菠蘿已經熟透，底部開始有霉，於是快快手開咗佢，浸埋鹽水放雪櫃。浸過鹽水後，食咗一件，又甜又有菠蘿蜜香。

放工時想下，個菠蘿咁香又咁多，不如試下整菠蘿蛋糕🍍🍰，反正未整過。

焗完放涼切開，已經聞到淡淡的菠蘿香味，食落甜咗D(知道菠蘿較甜，已經減咗糖)😂

黃豆醬焗雞翼

今日完全想唔到煮咩，放工路經菜檔，只係買咗一斤菜心苖，跟著就回家，途中想來想去都諗唔到煮咩。曾想過偷懶，但最後坐咗一陣後，打開冰箱，隨手攞出一包雞翼，再打開雪櫃，睇下可以點煮，見到一樽黃豆醬，就用嚟焗雞翼啦😁

 

黃豆醬焗雞翼 ﹕

材料 : 
雞中翼            10隻
乾葱(切片)       3粒
蒜頭(切片)       2粒
薑片                  4片
葱(切段)           2棵 (分開葱白、青葱)
紹酒                 1湯匙 (灒酒用)
黃豆醬             1湯匙

醃料 ﹕
胡椒粉              少許
紹酒                1茶匙
生抽                1茶匙
老抽             1/2茶匙
糖                 1/2茶匙
生粉                1茶匙

調味 ﹕
蠔油             1/2湯匙
糖                    1茶匙
水                    2湯匙

做法 ﹕

1.  雞翼徹底解凍後，用過面水加1茶匙鹽，浸20分鐘。洗淨抹乾水份，加入醃料醃30分鐘。

2.  準備好所有料頭。

3.  燒熱鑊(鍋)下油，油熱下雞翼，略煎兩面稍為黃金後，炒至8成熟取起。

4.  再燒熱鑊(鍋)，下適量油，油熱下料頭及葱白，爆香後下黃豆醬，炒勻及散出醬香後，把雞翼回鑊(鍋)兜勻，灒酒及下調味兜勻，加蓋轉中慢火焗5分鐘，下青葱關焗多2分鐘，即成。

 

香蕉蛋糕（低醣版）

見到家中幾隻香蕉已經起晒梅花點，一心整香蕉蛋糕，秤好晒材料，撕開蕉皮，啲蕉肉實的的無香味，用义壓蓉先聞到少許蕉味🤦🏻‍♀️

點解而家啲蕉咁嘅😅

由於老爺有血糖高，近兩年已經轉用羅漢果糖煮餸。今日試吓用嚟整蛋糕，用1:1的份量代替砂糖，完成品外表沒有改變，但味道就唔同，帶唔到香味出來，睇怕都要試多幾次😂

蓮藕支竹炆腩排

雪櫃內的兩節蓮藕，在過年前買嚟壓年，係時候煮埋嚟食，如果整蓮藕餅又用唔晒，不如炆腩排，放工即去豬肉檔，見還有腩排，於是買咗兩條，三個人食夠晒。

材料 ﹕蓮藕支竹炆腩排

蓮藕        2節

支竹        8條 (凍肉店買)

腩排        2條 (約12兩)

南乳        2磚

冰糖        1粒 (約手指公大)

薑         4-5片

蒜頭        1粒 (切片)

醃料 ﹕

胡椒粉         少許

紹酒        0.5湯匙

生抽        1.5湯匙

老抽           1茶匙

蠔油           1茶匙

生粉           1茶匙

油                 少許

 

做法 ﹕

1. 買腩排時，請肉檔主將腩排斬成適合用作炆的尺寸，回家用清水浸10分，清洗乾淨，用廚紙抹乾水份，加入醃料醃15分鐘左右。

2. 蓮藕切去頭尾，用小刀或西式匙羮刮去表皮，沖洗乾淨，切件及拍扁，備用。

3. 南乳加入1茶匙紹酒，用匙羮壓爛，備用。

4. 支竹用熱水拖一拖，取起備用。

5. 燒熱鍋(或鑊)，加入油燒熱，下腩排稍煎兩邊，加入蒜片兜勻，取起備用。

6. 原鍋(或鑊)，加少許油，下薑片及南乳爆香，加入蓮藕件炒勻(為免乾身至蓮藕濃，其間要慢慢注入少許清水)，把腩排回鍋兜勻，注入過面清水及冰糖，煮滾後蓋上蓋，慢火炆45分鐘。

  

6. 加入支竹兜勻，再炆5分鐘，試味即成。

備註 ﹕

- 各家的爐火及鍋具不同，受熱及鎖水各異，自行調節。

- 我用LOCK N LOCK鍋，鎖水幾好，其間沒有加過水，炆完45分鐘後，腩排已淋及剩下的湯水剛好。所以無加時及埋茨。

   

 

太子參乾螺頭蘋果豬腱湯

係時侯乖乖做返👩🏻‍🍳

見有幾個蘋果，加埋隨手在雪櫃可取的配料，就嚟個
龍年第一湯 ﹕太子參乾螺頭蘋果煲豬腱湯

         

材料 ﹕

太子參    40克 (溫和、補氣益血、生津健脾)
麥冬        40克 (養陰益氣、清虛熱、清心除煩、安神、改善腸胃、滋潤消化系統)
百合        40克 (滋陰養顏、潤肺止咳、寧心安神)
無花果      5粒 (抗發炎、消水腫、促進消化、抗癌、降血壓、降血糖、潤腸通便)
果皮          1角 (行氣止痛、健脾和胃)
乾螺頭      6粒 (滋陰補腎)
豬腱      480克 
蘋果          2個
清水        12碗

做法 ﹕

1.    豬腱解凍後，用過面清水+1茶鹽浸15-20分鐘。切開數件。
2.    乾螺頭及豬腱放入鍋中，注入過面水，用中慢火煲至滾起，再煲3分鐘取出，  沖洗乾淨。
3.    果皮洗淨浸至軟身，不用刮瓤。無花果洗淨，剪開兩邊，備用。
4.    太子參、麥冬、百合，沖一沖水後，用水浸10分鐘，再沖洗乾淨，隔水備用。
5.    蘋果去芯去蒂，不用去皮，切件。
6.    湯鍋注入清水，將所有材料放入，大火滾起轉最細火煲45分鐘，再轉中慢火煲1小時15分，試味下鹽，即成。

備註 ﹕

- 豬腱 ﹕我慣用急凍品(西班牙)，儲起幾舊放冰箱，想起煲就隔晚放普通格解凍。尼隻豬腱雖然是急凍，用嚟煲清都唔差。

 

鹽麴煎焗豬鞍扒

    星期六晚已將三件豬鞍扒放雪櫃上格解凍，星期日食完早餐就醃定，準備做晚餐。

    醃好後，我就攪衞生，攪到一半，老爺話順便執下小姐間房啦，D公仔堆到想開下窗都唔得。我簡直踏落個洞到，一執就執到五六點，腰骨都痛。中場兩點幾都係食外賣，何況晚餐呢，邊有體力去煮(成機偷下懶😜)

由於琴晚無煮，今日就唔洗買餸......

鹽麴煎焗豬鞍扒

材料 ﹕

豬鞍扒       3塊

鹽麴       2湯匙

急凍小椰菜  適量

三色小甜椒  適量

做法 ﹕

1. 豬鞍扒徹底解凍後，用鹽稀釋鹽水浸15分鐘後，沖洗多次，抹乾水份。

2. 把豬鞍放入食物器皿中，加入鹽麴拌勻，醃約2-3小時。

3. 三色椒切成小塊，小椰菜不用清洗，備用。

4. 煎鑊放入少許油，加熱後，放上豬鞍，每邊煎2分鐘後，加入小椰菜，蓋上蓋焗2分鐘後，反轉豬鞍，再焗2分鐘，用义或食物針刺入肉中，如沒有血水，即可取出，放碟上靜置5分鐘。小椰菜繼續留鑊中。

5. 加入三色甜椒，炒片刻，此時鑊中的汁開收，即可關火，把配菜上碟。

黑松露醬薯蓉

         今晚的豬鞍比較厚身，所以唔會配粉或飯，但係又有兩個man，整焗薯或薯蓉比較好d。見雪櫃仲有樽黑松露醬，於是決定整個簡簡單單的薯蓉。

黑松露醬薯蓉

材料 ﹕

美國焗薯     2-3個(視乎大細)

低脂淡忌廉   約3湯匙

無鹽牛油     約1湯匙

鹽              少許(自行試味)

黑椒碎          少許(個人喜歡)

黑松露醬     約1湯匙

做法 ﹕

1. 將薯仔放入煲中，注入清水，要過薯仔面，開火煮約20分鐘。

2. 蓋上煲蓋，焗約20分鐘，用义可以容易插入，即可取出，去皮切細，還有熱度時加入無鹽牛油、鹽及淡忌廉，再用义壓至適合自己口感。

3. 最後磨入適量黑椒碎及黑松露醬拌勻，即成。

醬燒雞下腿

好努力下，冷宮的凍肉比我清咗接近九成💪💪，今個周未或周日又可以去上貨。

前晚攞咗包雞下腿放在雪櫃普通格解凍，跟著琴日放工準備晚餐時一併醃定。分開咗兩包，一包放入冷宮，另一包放普通格，留待今日做晚餐。

大少回來時，問我今晚食咩? 我話有尼個焗雞下腿、菜飯同節瓜粟米羮。大少話你不如加多隻燶邊太陽蛋比我。

自家食譜 : 醬燒雞下腿(氣炸鍋)

材料 ﹕

雞下腿    1000克(約11-12隻)

蜜糖      適量 (燒野食用那種)

醃料 ﹕

紹酒      1湯匙

胡椒粉    少許

原味蒜粉  ½茶匙

义燒醬    2湯匙

柱侯醬    2湯匙 

做法 ﹕

1. 雞腿解凍後，用淡鹽水浸20分鐘，抹乾水份。

2. 將雞腿放入食物器皿中，先將醃料內的紹酒加入拌勻後，加入胡椒粉及蒜粉拌勻，之用义將每隻雞腿刺下，以便入味。再將义燒醬及柱侯醬加入拌勻，再用义將每隻雞腿刺下，分開每餐可食份量，放入保鮮袋內，封好口放入雪櫃，最好醃一晚。

3.焗前放室溫1小時。

4.氣炸鍋鋪上牛油紙，噴少許油，將雞腿平放好，用180度焗15分鐘，取出反轉再焗7分鐘，用义刺下無血水出，就掃上蜜糖，再焗2分鐘即成。

同場加映 : 燶邊太陽蛋、菜飯、節瓜粟米羮