雞哈豆腐

我從來無煮過這個餸，還記當年朋友在群組上載這菜式時，我仲話咩丫，未"麻婆豆腐"，點解叫"雞哈豆腐"。朋友話都係川菜，大致差不多，不過最後會放雞蛋。
今日想唔到食咩餸，而大少琴晚已經話你整可以送飯的餸。最初我都係想整"麻婆豆腐"，最後都係試咗尼個。

食譜 ﹕ 雞哈豆腐

材料 ﹕

免治豬肉        300克

豆腐                    1件

蒜茸                1茶匙

薑茸                1茶匙

蛋                        1隻(打散)

豆瓣醬            1湯匙

醃料 ﹕

生粉                1茶匙

水                    1茶匙

油                    1茶匙

調味料 ﹕

生抽                1湯匙

老抽             1/2湯匙

黃糖                1湯匙

鹽                 1/4茶匙

雞粉                1茶匙

水                 1/2碗

做法 ﹕

1. 豬肉加醃料拌勻，最少醃20分鐘。

2. 豆腐切粒，飛水2-3分鐘，盛起備用。

3. 燒熱適量油，下蒜茸及薑茸爆香，下豆瓣醬，加入肉碎炒勻。

4. 把調味料加入，煮滾後，加入豆腐煮至汁濃稠(如汁液太稀，可加入少許生粉水)，將蛋液加入拌勻，即成。

大醬湯

返安全島渡假，話咁快過咗四日四夜。
假期未完回歸原因係，今日要同大少到傢私鋪傾佢間房點整，成間屋已經攪掂整好，只剩佢個間。佢而家間房得張床褥、佢個老婆(即是佢的寶貝電腦，仲要只是用三張櫈朗起就算)，家姐返來入完佢間房，就同我講，細佬係唔係好enjoy佢間劏房😂
我都唔知佢點諗，一拖再拖，最後我都忍唔住出聲。要在復活節假期去傾，大廈外牆油漆，完成後拆棚，家姐會搬返來(大少的雜物堆到家姐間房滿滿，家姐其實都心大心細想早D搬返來，見到間房咁，又加上驚鼻敏感發作，所以暫時都在留安全島)。
在傢私鋪傾咗成兩個幾鐘，差不多三點走，跟著去咗食餃子，真係好飽，自從疫情開始後唔洗日日返工，我一個人的午餐好多時都唔食，張個早餐時間推遲，一餐當兩餐，已經習慣咗。
所以晚餐，簡簡單煮個大醬湯比兩父子就算。

食譜 ﹕ 大醬湯

材料 ﹕ (其實將自己喜歡的加入就可以)

薄豬肉片        1包(打邊爐個款)

豆腐                1磚

鮮蜆                半斤

洋葱                1個

甘筍                1條

節瓜                1個

大葱                1支

金菇                1包

薑                 2-3片

青葱                 1條

洗米水           適量(約2-3杯)

韓式大醬     3湯匙(啡色盒，按個人喜嗜)

韓式辣醬     1湯匙(紅色盒，按個人喜嗜或不加)

做法 ﹕

1. 鮮蜆用少許鹽浸，可以放把餐刀在水中，容易吐沙。煮前洗淨。

2. 準備洗米水(第一次洗的米水不要，之後洗的水用深盛起，洗好米繼續依平時咁煮飯)。

3. 豆腐洗淨切粒；金菇去根部，切短度；節瓜用匙羮或刀刮去皮，洗淨切件；甘筍去皮，洗淨切件；洋葱去衣，洗淨切粗條；大葱切走有根的部分，洗淨斜刀切件，分兩份；青葱切走有根部分，洗淨切短度，分開葱白同綠色部分，備用。

4. 湯鍋加油燒熱，下洋葱爆香後，加入薑片、葱白同一份大葱炒香，把節瓜、甘筍連同洗水加入，煮滾。

5. 將大醬放在隔篩內，把大醬慢慢溶入水中，之後會隔出豆蓉，取走不要。(如不用篩，可直接將大醬放進鍋中，這樣湯會不滑，會食到豆蓉)

6. 煮至節瓜差不多淋時，把豬肉片、鮮蜆加入，蓋上蓋煮至鮮蜆全部爆開口，將豆腐、金菇放入後，先加入辣醬，再滾起時即成，面放其餘的大葱同青葱，原鍋上桌。

備註 ﹕

以前我煮大醬湯時，不懂加入洗米水，及用隔篩將大醬放進鍋中，這個做法是以前同事的太太教我。

薯菜焗芝麻雞

今日同小姐行均整個安全島的超巿、凍肉店，加埋成10多間，都搵唔到春雞。最後都係要在成哥超巿(即百佳)買咗兩隻芝麻雞，用嚟焗。

食譜 ﹕ 

芝麻雞                2隻

牛油                  適量

薯仔                    2個

翠肉瓜                1個

黃色甜椒            1個

紅色甜椒            1個

** 薯菜自由配搭，將自己喜歡的加入可以)

芝麻雞醃料 ﹕ (每隻)

鹽                 1/2湯匙

紹酒                1茶匙

甜椒粉              適量

黑椒粉              適量

薯菜調味 ﹕

鹽                    1茶匙

黑椒粉              適量

橄欖油              適量

乾番西              適量

做法 ﹕

1. 芝麻雞洗淨，切走頸部及雞腳，在雞背切開，抹乾水份，加入醃料醃最少3小時(或過夜)。

2. 薯仔去皮、洗淨切件，翠玉瓜去蒂及尾，洗淨切件，黃紅椒去蒂去籽，洗淨切件。全部薯菜放入深碗中，加入調味拌勻。

3. 用200度預熱焗爐約15分鐘。 

4. 焗盆鋪上錫紙，將所有拌勻的薯菜鋪在焗盆上，將雞放在薯菜上(雞背向上)，掃上牛油。取一張錫紙(要蓋過焗盆)，掃上牛油，蓋在焗盆(牛油那邊貼在雞面)，包好。

5. 放進已預熱的焗爐內，用200度焗25-30分鐘。

6. 取出掀走錫紙，放進焗爐，轉220度焗約20分鐘，雞轉金黃色及熟，取出，待5-10分鐘，可進食。

柚子芝士餅

今個復活節假，連放五天，所以星期三放工後已返安全島渡假。第二朝，小姐已經order我，整尼樣整那樣.................
上次整咗個柚子忌廉餅，自己都唔係好滿意。今次試下改用忌廉芝士，而餅底用馬利餅，同時唔用蛋黃(因為小姐對生蛋黃有敏感，我處理得好唔好，睇小姐食完，就知道😅)
經眾多白老鼠試驗下，味道非常goodgood............，只是軟身咗少少。
咁即是有8-9成功啦，我會試到ok為止(當然口味各有不同)。先寫下食譜。
其實我寫BLOG的原因，有兩個 ﹕ 
(一)是比自己睇番
(二)是比小姐睇，將來佢自己有頭家時，都可以依我的食譜去煮。佢而家都好努力學習中，尤其整麵包同甜品。

 

酒香手撕雞

今日出咗三轉街。
第一轉 ﹕ 到凍肉鋪買冰鮮雞(想整海南雞飯)、到印尼鋪買班蘭葉，香茅、到雜貨鋪買米，紹酒、到超巿買豉油............
第二轉 ﹕ 到數字屋買有氣的水、到大型新式的雜貨鋪無糖汽水(補零食倉)。跟著洗好隻雞，醃定今晚煮。
第三轉 ﹕ 到另一間超巿買上兩轉買唔到的調味、買餅乾(大少早兩日已經叫買)、買吓日用品..............
好彩有架買餸車，如果唔係要出街十轉都唔掂。行完三轉，仲要做清潔，簡直耗盡精力，倦到我儍...................
原先醃好整海南雞，倦到我就咁放入蒸爐蒸熟，攤凍後，用手撕就算😝

食譜 ﹕ 酒香手撕雞

材料 ﹕  

冰鮮三黃雞                     1隻

蒸雞汁                          1/2碗

醃料 ﹕ 

紹                                 2湯匙

鹽                                 2湯匙

做法 ﹕

1. 冰鮮雞解凍後，徹底洗淨，抹乾水份，將醃料分別捽勻雞身及雞腔內，包好放雪櫃醃最少4小時或過夜。

2. 蒸前2小時置室溫(如果當日醃當日食，而天氣涼的話，我不會放雪櫃。

3. 置蒸爐，用100度蒸40分鐘(沒有蒸爐，水滾放入雞蒸40分鐘)，完成留爐5分鐘，取出，倒起半碗雞汁，待雞隻涼後撕好放上碟，將雞汁翻熱淋上雞面，灑上少許葱粒，即成。 

自家义燒

自己整既义燒，都會比個名佢┌自家义燒┐，因每人的口味不同，所以調味都會有所不同。
還記得細時，跟老爹去茶居食午飯時，佢喜歡叫义燒飯，而义燒係厚切，义燒面滿滿蜜汁，非常吸引。當老爹退休後，少之又少到茶居食午飯，佢間中會在家，自製义燒嚟食，家中無焗爐，佢有時會用炭爐燒，有時用鑊煎。
調味方面，當時是無义燒醬，老爹會用柱侯醬同甜醬(即是海鮮醬)、老抽、生抽、五香粉等等....................。味道都唔差o架😋
而我就靠當時佢落的調味，記得幾多得幾多去試合家人的口味，因有人唔喜柱侯醬，所以我無落。
而家有焗爐，當然用焗爐啦! 配埋菜飯，簡直頂呱呱👍

 

食譜 ﹕ 自家义燒

材料 ﹕

急凍梅頭肉              1000克(約2磅)

調味 ﹕

鹽                      1茶匙

黃砂糖              1茶匙

五香粉              1茶匙

生抽                  1湯匙

老抽                  1茶匙

玫瑰露              1茶匙

紹酒               1/2湯匙

义燒醬              2湯匙

掃肉面 ﹕

义燒醬                 適量

掃义燒面 ﹕

燒烤蜜糖             適量

做法 ﹕

1. 急凍梅頭肉徹底所解凍，洗淨抹乾水份。切成粗條狀(如上圖)。

2. 將所有調味料放入器皿中，拌勻。

3. 把梅頭放進，用手將調味沾滿肉上，用义戳下肉，尤其較厚的位置，再沾下調味，蓋好，放雪櫃醃一晚。

4. 第二天焗前2小時，置室溫。

 

5. 預熱焗爐，200度15分鐘。焗盆鋪上錫紙，薄薄掃上一層油，將肉放上，跟著蓋上一張(要蓋過焗盆)同樣掃一層薄油的錫紙。放進焗爐，用200度焗約30-35分鐘。

6. 取出，掀走焗盆上的錫紙不要，倒起肉汁，取用1/2湯匙肉汁與掃面用的义燒醬拌勻。掃上肉上，續用200度焗約10分鐘，取出反轉，再掃义燒醬，放入焗約10分鐘。

7. 取出掃蜜糖焗至有少許燶，取出反轉掃蜜糖，同樣焗至有少許燶，可取出。

8. 待稍為涼，可切件上碟。

牛蒡合掌瓜腰果素湯

每逢煲這個湯，我都會想起我大嫂的烏龍事。事原這湯是她教我煲的，有一次家族新年聚會，我建議煲這湯，因這湯可以排毒(因新年大家食得太油膩)。她飲後話好好飲，點煲.......? 我話吓，你教我煲既喎😂
這個對積咗濕毒的人，尤其有效，飲完個多小時，就去排毒。

食譜 ﹕ 牛蒡合掌瓜腰果素湯

材料 ﹕ (3-4人)

鮮牛蒡                   1支

合掌瓜                   2個

紅蘿蔔                   1個

腰果                    1/2碗

蜜棗                       4粒

南北杏                   1湯匙

清水                     12碗

做法 ﹕

1. 鮮牛蒡去泥洗淨(我會用一塊新的綠色百潔布刷洗)，用刀削去皮(可以會保留皮，今次洗了多次都是去不清泥，所以我去皮)，切大件。

2. 合掌瓜(記得戴手套處理)、紅蘿蔔分別去皮，洗淨切件。

3. 腰果、蜜棗、南北杏，洗淨備用。

4. 將清水注入湯煲內，把所有材料放入煲內，大火煲滾，轉細火煲2小時，下鹽，即成。

西式晚餐

早排老爺在公司樓下，開倉買咗D牛柳，同一件斧頭扒返來。老爺見我哋一家四口好耐無一齊食飯，所以在上星期已約定小姐今晚返來食。

豐富的西式晚餐 ﹕

1. 西班牙火腿(先前買凍肉時，店主送)，配白蜜瓜

2. . 香濃忌廉蘑菇湯 (稍後補上食譜)，蒜茸牛油法包。還有小  姐整的黑糖包

 

3. 香草豬肉腸、德國腸及啤酒肉丸(這個丸好鹹，唔會有下次)

4. 今晚的主角，斧頭扒(稍後補上食譜)。

 

鹽酥雞軟骨(氣炸鍋)

少爺喜歡食埋D香口野，尼味雞軟骨，每次整都話我整得少，今晚簡直滿足佢，一人食了大半。

食譜 ﹕鹽酥雞軟骨(氣炸鍋)

材料 ﹕

雞軟骨            460克 

生粉                  適量

醃料 ﹕

紹                    1茶匙

糖                 1/2茶匙

鹽                 1/4茶匙

鹽焗雞粉        1湯匙

做法 ﹕

1. 雞軟骨徹底解凍，沖洗乾淨，抹乾水份。

2. 加入醃料拌勻，醃約最少1小時。

3. 將生粉(適量)放入膠袋，加入部分雞軟骨，用手揸著袋口，撈勻至所有骨沾上生粉。(我分兩次做，所以生粉及雞軟骨分成兩份)

4. 將已沾上粉的雞軟骨，放入炸籃內，不用噴油，用200度炸12分鐘(中途取出，搖下)，即成。

金銀蒜粉絲蒸龍利柳

今日過咗個非常驚嚇的愚人節早上。
因為部抽濕機燒咗舊電溶，攪到以為燒著電線定燒著其他嘢。嚇到我屎屎吓😱
攪到我成日都失魂落魄，連今晚食咩都想唔到。
求其在冰箱摷下有咩就煮咩😛

食譜 ﹕ 金銀蒜粉絲蒸龍利柳

材料 ﹕

急凍龍利柳            1條(約500克)

粉絲                        1扎

蒜茸                 1/2湯匙 (醃魚用)

蒜茸                 1/2湯匙 (伴炸茸用) 

炸蒜茸             1/2湯匙

醃料 ﹕

胡椒粉                  少許

紹酒                    1茶匙

黃糖                 1/2茶匙

生抽                    1茶匙

老抽                 1/2茶匙

蠔油                    1茶匙

生粉                 1/2湯匙

油                     1/2湯匙 (最後落)

調味 ﹕

黃糖                 1/2茶匙

鹽                     1/4茶匙

油                          少許

做法 ﹕

1. 魚柳徹底解凍後，洗淨切件，抹乾水份(索乾身D)。

2. 粉絲浸軟，沖洗後，剪一剪碎。再用熱水浸約1分鐘，取起隔水，放碟上。

3. 把醃料(除生粉及油外)加入魚柳拌勻，加入1/2湯蒜茸及生粉拌勻，最後落油拌勻，醃約15分鐘。放粉絲面。

4. 炸蒜茸、1/2湯匙的蒜茸及調味拌勻後，放魚上。

5. 放入蒸爐，用100度蒸7分鐘(如用明火，同樣大火蒸7分鐘)，即成。