菠蘿雞肉薄餅(Pizza)

大部份時間都係得我同老爺兩個食，兩個又唔食得多，每餐都係一兩款，所以唔洗諗到頭爆😂
琴晚見雪櫃仲有半包芝士碎，過往成日都唔得，實放到發霉。為免浪費，用嚟整pizza。
今晚一個pizza + 煙三文魚沙律，又攪掂一餐😀😁
今次焗pizza時，加埋塊熱石板，效果真係唔同d

 

  

羅漢齋炒麵

今個學年的大假，除咗2019年聖誕及2020年農曆新年加埋放咗幾日外，其他十幾日大假放嚟都係吽菇，其實除咗我之外，佔大部份打工仔都係，因疫情關係，無得周圍飛。祈求不再來，打工的有工返、生意人就生意興隆🙏財源滾滾來...........

今早起來，原來九號風球(海高斯)，仲以為全日唔洗返添😅

點知11點幾就轉咗三號，大家都準備返工啦................

放咗咁日假，又加上打風，返咗半日，都做到儍儍地，好彩琴日已經諗咗今晚食咩野，因為今日適逢七月初一，心血來潮就整個齋炒麵。

食譜 ﹕ 羅漢齋炒麵

材料 ﹕

炒麵餅             1個

粟米芯          4-5條

荷蘭豆            適量

雪耳(已浸發) 適量

雲耳(已浸發) 適量

甘筍                 6片

薑                     3片

調味 ﹕

生抽          1/2湯匙

蠔油          1/2湯匙

香菇粉      1/2茶匙

糖                 2茶匙   

麻油               少許

清水             1/2碗

獻汁 ﹕

生粉水            適量

做法 ﹕

1. 煲滾適量熱水，將粟米芯灼2分鐘後，把荷蘭豆、雪耳、雲耳放進灼1分鐘取起，隔軟水份。

2. 原煲的水再滾起時將麵餅放進，淥至軟身(期間要挑鬆麵體)，隔起沖至麵凍身及隔走水份。

3. 易潔鑊下適量的油(大約2湯匙左右)燒熱，將已麵放入鑊，略為煎至少許金黃後(不要煎濃)，返轉煎第二面，同樣煎至少許黃，即轉放碟上，備用。    

4. 原鑊下少許油，將薑片及甘筍片爆香後，將調味及配菜加入，煮至滾起時，埋獻，即可鋪在麵上，即成。                     

蟲草花蒸雞 (Meile蒸爐版)

我的記憶隨著年紀、家庭的煩憂，慢慢地退化。
如果人的記憶可以似電腦的FILE就好，將唔開心的，一一DELETE就好啦~~~~~~~~~~~~~~
尼個食譜，係今早睇番啲相，先知無寫下🙈

食譜 ﹕ 蟲草花蒸雞 (Meile蒸爐版)

材料 ﹕
雞胸肉(急凍)            1件
雞上肶肉(急凍)        2件
蟲草花                     適量
薑                               4片
葱                               1條

醃料 ﹕
胡椒粉                      少許
紹酒                     1/2茶匙
鹽                         1/4茶匙
糖                         1/2茶匙
蠔油                        1茶匙
生抽                        1茶匙
老抽                     1/2茶匙
生粉                        2茶匙

做法 ﹕
1. 雞解凍後(不用清洗)，用1/2茶匙拌勻，靜置15-20分鐘。用水清洗至沒有血水。切件，雞上肶肉可去皮或不去。
2. 葱切短度，分開葱白及青葱。
3. 雞件抺乾水份，放入碗中，加入醃料、薑片及葱白拌勻，醃約20分鐘。

4. 蟲草花用水浸5分鐘，洗淨揸乾水份，放雞面。

5. 將雞置入蒸爐，用100度蒸約12分鐘，取出，放上青葱(如不喜生葱，可醃雞時一併放進拌勻)，即成。

簡易拍青瓜 (不辣版)

我家的雪櫃已經用過25年以上，經歴一次搬家。
最近開始有啲異樣，放普通格的蔬菜，接近出風口那邊，開始有結凍的情況，同老爺講，佢話會唔會塞住咗出風口，所以結冰? 我話無，已經離開成寸。
結論是，佢已經老了，機件可能開始老化，所以用得一日得一日。佢真係好好用，我還記得當年買的時候都要成六千多元，儲存量的確比而家的多。而家開始物色緊，又要合尺寸，又要儲存量大🙈
包青瓜，有兩三條的頭結咗冰，要消滅佢，雪得咁凍，當然整拍青瓜啦💪

食譜 ﹕ 拍青瓜

材料 ﹕
溫室青瓜             5-6條 (隨意或用1條大青瓜)
蒜蓉                     2湯匙
鹽                         1茶匙

汁料 ﹕
黃糖                    3湯匙
熱水                    1湯匙
鎮江香醋         4.5湯匙
生抽                    1茶匙
麻油                    2茶匙

做法 ﹕
1. 黃糖、熱水拌勻至糖完全溶解，加入其他汁料及蒜蓉拌勻，
    待用。其間可放入雪櫃雪凍。
2. 清瓜洗淨，切去頭尾，切開兩邊，去籽，切段略拍。
3. 用鹽拌勻，靜置15-20分鐘。用凍食水略洗。抹乾水份，放 入玻璃器皿中，加入汁拌勻，即成。

鹹蛋蒸肉餅飯 + 櫻花蝦蒸娃娃菜 (Meile蒸爐)

而家一放工都係直接回家，屋企有儲糧，連街巿都唔洗去。其實有時都好悶，想行下，但基於而家的情況，都係九秒九回家吧🙈

今晚又一爐攪掂，有肉有菜。

老爺見到話，今晚洗少好多沙煲瓦罉😂

食譜 ﹕ 鹹蛋蒸肉餅盎頭飯(Meile蒸爐版)

材料 ﹕ 2人份量

免治豬肉                  300克 

鹹蛋                              1隻

白米                              1杯

清水                              1杯

麥片                          3湯匙

燉盅                              2個 (我用 Le Creuset)

醃料 

胡椒粉                          少許

紹酒                            1茶匙

鹽                             1/4茶匙

糖                             1/2茶匙

生抽                            1茶匙

蠔油                            1茶匙

清水                            1湯匙

做法 ﹕

1. 鹹蛋洗淨，分開蛋黃、蛋白。蛋黃切成兩邊，備用。

2. 免治豬肉放碗中，加入醃料(除清水外)及鹹蛋白，順方向攪拌至有黏性。

3. 加入麥片及清水，攪拌至麥片溶入肉中，置雪櫃15分鐘。

4. 米洗淨，加入清水，平均分入燉盎內，置入蒸爐用100度蒸20分鐘。

5. 取出肉碎，分成兩份。飯蒸好後，將每份肉碎略握成圓，然後放上飯面，稍為壓平，再放上鹹蛋黃。

6. 置入蒸爐用100度蒸18分鐘。即成。

櫻花蝦蒸娃娃菜 (Meile 蒸爐版)

材料 ﹕

娃娃菜              2棵

櫻花蝦乾      2湯匙

清雞湯              1碗

做法 ﹕

1. 娃娃菜撕開一瓣瓣，洗淨，放蒸碟上。

2. 置入蒸爐用100度蒸7分鐘，取出隔走水份。

3. 將清雞湯注入碟中，菜面放上櫻花蝦。置入蒸爐用100度蒸5分鐘即成。

備註 ﹕

蒸飯 + 蒸菜的流程 

1. 將蒸按100度 + 按20分鐘，放入兩盅米，蒸到13分鐘時，放入娃娃菜，繼續至爐響提示時，取出菜及飯。

2. 飯加入肉後，按100度 + 按18分鐘，蒸到13分鐘時，將娃娃菜放入爐肉，繼續蒸至完成所有時間。

日式咖喱雞 (玫瑰鍋)

今日放假，無出過街。
早餐 + 午餐 ﹕簡單淥個Indo mei 加d兩粒魚旦同魚春卷
晚餐 : 就係利用儲糧，簡簡單單煮個日式咖喱，仲可以聽日帶飯添😃

同場加映

老爺將兩碟飯轉一轉，叫我係高位影，你睇似咩😂

飯面加D，就成個人咁😁

  

明天可以帶飯

食譜 : 日式咖喱雞 

材料 ﹕ 3人份量
雞胸肉               2件
去骨雞上脾       1件
薯仔 (中)           2個
甘筍                   1條
洋葱                   1個
西芹                   2支
蒜茸               1湯匙
熱水                 適量
日式咖喱磚     適量 (今次我用中辣，大約用咗半磚，自行加減)

醃料 ﹕
胡椒粉            少許
紹酒                少許

做法 ﹕
1. 雞肉解凍後，用1茶匙鹽拌勻，靜置15-20分鐘，用水清洗至沒有血水。
2. 抺乾水份，雞上脾的皮可去或不去，切件，雞胸肉切件。
3. 薯仔、甘筍去皮，洗淨切件。
4. 洋葱去皮，洗淨切粒，西芹用刨去根，洗淨切粒。

  

5. 鍋內加少許油，燒熱後，加入雞件略煎，取出。(由於用急凍雞，雞件會出大量水，可用廚房紙索走水份。)

  

6. 原鍋，加入少許油，下洋葱、蒜茸爆香後，加入西芹、薯仔及甘筍炒勻，注入熱水，蓋過材料就可，大火煮滾後，蓋上蓋轉細火煮約20分鐘。

  

7. 加入雞肉、咖喱磚(放在湯勺內，用筷子慢慢攪拌至溶解，才全部放進，以免出現不均勻)。

8. 不用加蓋，煮滾後，用細火繼續煮約15分鐘左右至汁轉濃稠(留意不要煮至痴底)，試味即成。

瘦肉粥 (玫瑰鍋)

天氣熱，唔煮又唔得，唯有轉吓款，煲個粥，放工買油炸鬼，見到有牛脷酥，真係好耐無食過，各買一條，食前用氣炸鍋番熱，脆卜卜。

 

食譜 ﹕ 瘦肉粥 ( 2人份量)

材料 ﹕
米                 1/2杯
清水                8杯
瘦肉            240克 (冰鮮肉)
葱粒              適量

醃料 ﹕
胡椒粉          少許
紹酒         1/2茶匙
鹽             1/4茶匙
糖             1/2茶匙
生抽            1茶匙
蠔油            1茶匙

做法 ﹕
1. 瘦肉解凍後，用1/2茶匙鹽拌勻，靜置15-20分鐘。用水清洗至沒有血水。
2. 抹乾水份，切片，用醃料拌勻，醃30分鐘或以上。
3. 米洗淨，隔走水份，放入冰格雪30分鐘。
4. 注入清水入鍋中，水滾後，將已雪的米放進，大火煲，不用蓋上煲蓋，要時不時攪拌，以免痴底。

5. 煲至開花，關火焗至進食前，開火煲滾後，加入瘦肉煲至瘦肉全熟，試味，晒上葱花即成。

甜酸雞膇 (氣炸鍋版)

繼續留家煮💪💪
早排在凍肉店買咗套無激素的雞中翼同雞膇，新張期內$79一套，都幾抵買。
今日開咗包雞膇試下，都可以。

食譜 ﹕ 甜酸雞膇

材料 ﹕
雞膇                  8隻
生粉                適量
保鮮袋              1個
泰式甜酸醬    適量

醃料 ﹕
胡椒粉           少許
紹酒          1/2茶匙
無鹽蒜粉  1/2茶匙
鹽              1/4茶匙
甜紅椒粉  1/2茶匙

做法 ﹕
1. 雞膇解凍後，用1/2茶鹽(醃料外)拌勻，靜置10-15分鐘。用水洗淨至沒有血水。

2. 抹乾水份，加入醃料拌勻，蓋上保鮮紙，醃最少3小時。
3. 將適量的生粉放入保鮮袋中，把雞膇放入(最好隔走醃汁)，然後手揸袋口，搖勻至雞膇已沾上薄粉。

4. 取出氣炸鍋炸籃，掃上一層薄油，將雞膇鋪上，雞膇面掃上一層油，放回主鍋內，用180度焗10分鍋，轉200度3-5分鐘，即成。
備註 ﹕
- 每個炸鍋不同，自行調節。
- 口味各不同，份量只作參考。

自家义燒 2.0 版

終於出現返雙位數字，希望疫情真係受控。

大家要繼續努力，唔好鬆懈💪💪💪💪💪

星期日已經焗好的义燒，變成今日的晚餐。

焗完後，令我想起細個時，跟老父去茶居食飯時，义燒飯就係好似咁大大舊，义燒面佈滿蜜汁，真係好好食。

我今次無落蜜汁，係就住老爺。

即日焗好的成品

尼個係隔咗一晚，第二包錫紙番焗的成品。

淥兩個麵，加啲菜，又攪掂一餐。

食譜 ﹕ 自家义燒 (氣炸鍋版)

材料 ﹕

梅頭扒                       400克

醃料 ﹕

無鹽薑粉                1/4茶匙

紹酒                           1茶匙

玫瑰露酒                   1茶匙

生抽                       1/2茶匙

义燒醬                      2湯匙

掃面料 ﹕

义燒醬                      2湯匙

做法 ﹕

1. 梅頭扒解凍後，直接加入1/2茶匙鹽(醃料以外)拌勻，靜置15-20分鐘。

2. 清洗至沒有血水，索乾水份，先將醃料拌勻後，加入梅頭扒拌勻醃最少4小時，或過夜。

3. 掃一層油在氣炸鍋的炸籃上，將梅頭扒平放在籃上。

4. 用160度焗5分鐘，取出掃上义燒醬，用160度焗10分鐘。

5. 取出返轉掃义燒醬，再用160度焗10分鐘。

6. 取出散一散熱，如需要掃蜜汁，在這時掃。不想就直接，轉用200度焗3-5分鐘至义燒有少許燶邊，即可。

Flipper's 午餐

今早有事出銅鑼灣，順便同老爺撐下枱腳(而家通常都得我倆食，小姐還未回歸，大少尼排發緊脾氣，唔同我吔食)。
老爺成日話， 無所謂啦! 遲早都有尼日，不過早咗啫!

點解去尼間餐廳食，只不過行開尼邊，又唔知食咩，見早兩星期，外甥女去過，影相出嚟，又幾吸引，就係咁..............

好唔好食，見仁見智，因疫情關係，人流真係少之又少，而限每枱只可坐兩人，所以係舒服。私心的話，是好啲。但以經濟角度，就no la...........................

點咗 2杯 cappuccino，一份燒肉三文治(法包)，再加個限定的士多啤梨舒芙利 pancake 。兩個人已經好飽好滿足。