銀魚煎蛋

        自從農曆年過後，除本身工作忙外，加上小姐要籌備結婚，唔多唔少都幫下佢手，攪D鎖碎的事，再加埋自己又要睇中醫調理身體，所以一個星期都煮唔到一餐，有時成個星期都外賣或出外食。

小姐的婚禮，終於在上個月底順理完成，開始佢人生另一階段。而我又開始定下來。

因為開始煮番飯，自然就要睇下冰箱、食物櫃等等，遂一打開，先發現先前買落好多罐頭、凍肉，調味料等等，有D已經過期，揀選後有D過期係唔留得，自然去咗堆田區啦，有D寫最佳食用期的，我已經放咗出嚟，要盡快KO佢地。

    

自家食譜 ﹕銀魚煎蛋

材料 ﹕		醃料 ﹕
急凍銀魚(200G)	1包	紹酒	1/2茶匙
雞蛋	3只	胡椒粉	少許
葱	2條
		調味 ﹕
		鹽	1/2茶匙

 

做法 ﹕

1. 銀魚解凍後，沖洗乾淨，抹乾水份，加入醃料拌勻，備用。

2. 葱除去根部及表面的衣，洗淨切粒。

3. 雞蛋打入深碗中，加入調味，打勻成蛋液。

4. 把銀魚及葱放入蛋液中，拌勻。

  

5. 熱鑊下油，油熱後加入蛋液，用中火慢煎蛋液凝固至9成熟後反轉，再煎至全熟，即成。

臘腸炒菜飯

    昨晚食剩約2條臘腸，白飯又食剩1碗，唯有買D菜，再煲多少少飯用黎炒個飯，真係慳家，哈哈~~~~~~~~~~~~~~~~~

自家食譜 ﹕臘腸炒菜飯

材料 ﹕		調味 ﹕
臘腸	2條	鹽	1/4茶匙
雞蛋	1只	生抽	1茶匙
白菜	約3棵
白飯	3碗	紹酒(灒酒)	1/2茶匙
薑	3片

做法 ﹕

1. 臘腸用熱水沖洗表面的油份，隔水蒸15分鐘，待涼後去衣，切粒。

2. 白菜洗淨，切細碎。薑片切粒。

3. 燒熱鑊下少許油，爆香薑粒下白菜炒至軟身，取出隔去水份。

4. 雞蛋打勻成蛋液。燒熱鑊下油，下油將蛋液炒熟後，弄碎取起，備用。

5. 原鑊把臘腸炒至油出後，灒入紹酒炒勻。

6. 下白飯炒至散開，加入調味炒勻，最後加入白菜及雞蛋，即成。

木瓜花生雞腳湯

星期四放工後，就入安全島渡假，休息咗幾日，今早就同老爺講，今日食完早餐就回歸港島啦。回程中，要想下晚餐外出食，還是自煮呢? 最終都係選擇留家煮，原因係咁早返屋企，入咗屋都唔願意再出街，一個字”懒”囉

 自家食譜 ﹕木瓜花生眉豆雞腳湯

材料 ﹕		調味 ﹕
木瓜	1個	鹽	適量
雞腳 (冰鮮)	12隻
花生	1/2碗
眉豆	1/2碗
蜜棗	2粒
清水	10碗

 

做法 ﹕

1. 雞腳去甲後，跑活水，再用清水洗淨。

  

2. 木瓜洗淨去皮去籽，切件。花生、眉豆及蜜棗洗淨。

3. 將全部材料及清水放入煲內，用大火煲後，繼續煲15分鐘，轉細火煲1.5小時，調味即成。

 

長洲太平清醮

 多年無返過安全島睇太平醮，適逢今次有連續幾天假期，就湊下熱鬧。但有點失望.............可能近尼兩三年移民潮影響，少咗好多後生幫手。眼見只有上年紀的幫手，天氣又熱，真係替他們辛苦，他們經過我前面，我唯有同他們打氣，加油加油，辛苦晒......... 但是這些長輩覺得辛苦都值得，尼D都係傳統

如果返入去，在巡遊前一晚，必定會去北帝廟上香。今次最失色係這兩座包山，簡直........ 不願至評......................

巡遊最吸睛的這班小朋水，我兩位少爺少姐細時都有參與過。

紅青蘿蔔陳腎腰果湯

琴日放工忘記買紅青蘿蔔，今早速速出去，速速回。

準備材料時，切開個青蘿蔔，點知係黑心。點算尼?

好唔好攞去換 ?  

落到去，收檔未呢 ?  (疫情關係，運輸問題，好多菜檔，少菜買仲要好貴)

未收檔仲有無青蘿蔔呢 ? 

想咗一陣，博一博啦，因為一個紅蘿蔔加一個青蘿蔔，已經成三十幾蚊。

好彩，菜檔未收，仲有青蘿蔔，EE好好人，換番比我，仲切開兩邊睇吓有無黑心。

換完，九秒九回家啦。

保護自己、保護家人，煲多啲湯水💪💪💪💪💪

  

自家食譜 ﹕

紅青蘿蔔陳腎腰果湯
材料 ﹕			調味 ﹕
紅蘿蔔(1個)		約600克	鹽
青蘿蔔(1個)		約300克
陳腎(視乎大細)		4個
腰果		80克
陳皮		1角
蜜棗(視乎大細)		2-3粒
南北杏		2湯匙
清水		10碗
做法 ﹕
1.	陳皮用水浸軟，備用。
2.	紅蘿蔔、清蘿蔔分別去皮，洗淨切件。
3.	陳腎放入煲內，注入清水浸過面，開火煲至水滾，再煲5分鐘，取起清洗，用刀在面界幾刀，以便出味。
4.	腰果、蜜棗及南北杏沖水。
5.	將全部材料及清水放入煲內，大火煲滾後，轉細火煲2小時，試味後先加鹽，即成。

 

牛肉漢堡

第五波疫情至今差不多攪咗兩個月，無回落不單止，仲要隔兩三日就創新高。

強檢 _ 排幾個鐘去做強檢。

醫療 _ 確診者挨間抵夜、受寒冷的天氣等侯。真是難為了長者及幼兒。

蔬菜 _ 食菜貴過食肉。

這些日子要挨幾耐呢..........................................

真是要自求多福，大家身體健康。

繼續自煮晚餐。牛肉漢堡伴燒汁

近幾個月，自己戒咗食牛，係好奇怪，食親就唔舒服，天意，唯有唔食啦。

自己唔食啫，老細們(家裏)都要食O架。

今晚的漢堡，佢地話好味及滑，如果入面有埋芝心就好嘞^-^

自家食譜 ﹕

牛肉漢堡
材料 ﹕			調味 ﹕
免治牛肉		450克	鹽	1/2茶匙
洋葱 (中型)		1/2個	黑椒碎	少許
雞蛋液		50克
麵包糠		18克
鮮奶		36克
做法 ﹕
1.	洋葱切碎。熱鑊加少許油，放入洋葱炒至軟身透明，取出待涼。(期間加入少許鹽及水)
2.	將牛奶加入麵包糠內，拌勻備用。
3.	把免治牛肉放入深碗內，加入已浸的麵包糠、蛋液、洋葱碎及調味，用手攪拌至免治肉全部吸收所有液體。
4.	拌勻後，將免治肉捽打數次至有黏性。
5.	平均分成6份。取起一份，左右手擲數次(目的是除去肉糰內的空氣)成糰。
	搓成肉糰後，放在平盆上，用手稍為壓一壓，放入雪櫃(普通格)，冷藏2-3小時。
6.	燒熱平底鑊，下少許油(不用太多，因免治肉有油份滲出)，把餅肉放入，煎至餅側面有一半轉色，反轉加上鑊蓋煎另一面至熟，即成。