紅青蘿蔔陳腎腰果湯

琴日放工忘記買紅青蘿蔔，今早速速出去，速速回。

準備材料時，切開個青蘿蔔，點知係黑心。點算尼?

好唔好攞去換 ?  

落到去，收檔未呢 ?  (疫情關係，運輸問題，好多菜檔，少菜買仲要好貴)

未收檔仲有無青蘿蔔呢 ? 

想咗一陣，博一博啦，因為一個紅蘿蔔加一個青蘿蔔，已經成三十幾蚊。

好彩，菜檔未收，仲有青蘿蔔，EE好好人，換番比我，仲切開兩邊睇吓有無黑心。

換完，九秒九回家啦。

保護自己、保護家人，煲多啲湯水💪💪💪💪💪

  

自家食譜 ﹕

紅青蘿蔔陳腎腰果湯
材料 ﹕			調味 ﹕
紅蘿蔔(1個)		約600克	鹽
青蘿蔔(1個)		約300克
陳腎(視乎大細)		4個
腰果		80克
陳皮		1角
蜜棗(視乎大細)		2-3粒
南北杏		2湯匙
清水		10碗
做法 ﹕
1.	陳皮用水浸軟，備用。
2.	紅蘿蔔、清蘿蔔分別去皮，洗淨切件。
3.	陳腎放入煲內，注入清水浸過面，開火煲至水滾，再煲5分鐘，取起清洗，用刀在面界幾刀，以便出味。
4.	腰果、蜜棗及南北杏沖水。
5.	將全部材料及清水放入煲內，大火煲滾後，轉細火煲2小時，試味後先加鹽，即成。

 

牛肉漢堡

第五波疫情至今差不多攪咗兩個月，無回落不單止，仲要隔兩三日就創新高。

強檢 _ 排幾個鐘去做強檢。

醫療 _ 確診者挨間抵夜、受寒冷的天氣等侯。真是難為了長者及幼兒。

蔬菜 _ 食菜貴過食肉。

這些日子要挨幾耐呢..........................................

真是要自求多福，大家身體健康。

繼續自煮晚餐。牛肉漢堡伴燒汁

近幾個月，自己戒咗食牛，係好奇怪，食親就唔舒服，天意，唯有唔食啦。

自己唔食啫，老細們(家裏)都要食O架。

今晚的漢堡，佢地話好味及滑，如果入面有埋芝心就好嘞^-^

自家食譜 ﹕

牛肉漢堡
材料 ﹕			調味 ﹕
免治牛肉		450克	鹽	1/2茶匙
洋葱 (中型)		1/2個	黑椒碎	少許
雞蛋液		50克
麵包糠		18克
鮮奶		36克
做法 ﹕
1.	洋葱切碎。熱鑊加少許油，放入洋葱炒至軟身透明，取出待涼。(期間加入少許鹽及水)
2.	將牛奶加入麵包糠內，拌勻備用。
3.	把免治牛肉放入深碗內，加入已浸的麵包糠、蛋液、洋葱碎及調味，用手攪拌至免治肉全部吸收所有液體。
4.	拌勻後，將免治肉捽打數次至有黏性。
5.	平均分成6份。取起一份，左右手擲數次(目的是除去肉糰內的空氣)成糰。
	搓成肉糰後，放在平盆上，用手稍為壓一壓，放入雪櫃(普通格)，冷藏2-3小時。
6.	燒熱平底鑊，下少許油(不用太多，因免治肉有油份滲出)，把餅肉放入，煎至餅側面有一半轉色，反轉加上鑊蓋煎另一面至熟，即成。

法式洋葱湯 (雞湯版)

尼個blog有一段時間無打理過，除咗工作忙之外，其實都係懶得動。

係時候要回歸。

今日到超巿，見到澳洲洋葱，只係$10就有一袋(1KG裝)，反正小姐早兩日就話想飲洋葱湯。所以今晚煮咗個雞湯版的[法式洋葱湯]

自家食譜 ﹕法式洋葱湯 (雞湯版)

材料 ﹕4-5人份量

洋葱	1000克
清雞湯	1公升
無鹽牛油	40克
油	1/2湯匙
鹽	1/4茶匙
麵粉(all purpose)	1湯匙+1茶匙
糖	1茶匙
白餐酒	125ml
法包	4片
披薩芝士碎	適量

 

做法 ﹕

1. 洋葱去衣洗淨，切幼條，備用。

2. 湯鍋下油及牛油，開火用中細火煮至牛油溶解後，加入洋葱，轉中火炒均後，加鹽炒至洋葱軟身。(如覺得乾，水份不足加1湯匙水)

3. 湯鍋，蓋上湯蓋，轉至最細火煮50-60分鐘至洋葱全部透明狀或溶解。

4. 掀走湯鍋蓋，轉中至大火炒至洋葱收水(但不可以燒焦)。

5. 關火後立刻加入麵粉，拌勻至麵粉溶解。加入糖及白酒，開火用中慢火煮約2分鐘左右，讓酒精蒸發下。

6. 轉大火，隨即加入清雞湯，滾起後去掉湯面的浮泡及油，轉細火加蓋煮30分鐘。

7. 預熱焗爐，用200度將法包每邊焗至脆身(像多士般)，取出備用。

8. 湯煮好後，試味(我沒有再加鹽，因為已經足夠)，可加入適量胡椒粉拌勻。

9. 將湯加入4個湯盅內，各放一片法包及灑上芝士碎。入焗爐，用250度焗至芝士溶(約3-4分鐘)，即成。

泰式豬頸肉 (氣炸鍋版)

 好耐無買過豬頸肉(急凍品)，用嚟煮餸，上星期買咗一包，差不多1磅，成惠$70+🙊

見唔係成日食，就無所謂，不過真係貴咗好多好多......................

自家食譜 ﹕ 泰式豬頸肉 (氣炸鍋版)

材料 ﹕ 豬頸肉(急凍) 香茅(取白色部分) 蒜頭 芫茜(根部) 檸檬葉 食物膠袋   沾汁 ﹕ 酸柑仔 (泰式青檸檬) 魚露 椰糖 熱水 芫茜

500克 3條 2粒 2根 2片 1個     1-2個 適量 適量 適量 1湯匙

醃料 ﹕(A) 胡椒粉 原味蒜粉 紹酒   醃料 ﹕(B) 椰糖 魚露 生抽 蠔油

少許 1茶匙 1茶匙     1湯匙 1湯匙 1/2湯匙 1茶匙

 

做法 ﹕

1.     豬頸肉徹底解凍後，洗淨抹乾水份，加入醃料(A)醃15-20分鐘。

2.     檸檬葉撕走中間的梗，香茅取用白色部分，切細段。

3.     全部香料(香茅、蒜頭、檸檬葉、芫茜根)及醃料(B)放入攪拌機內打碎。

4.     打拌後，全部倒入食物袋內，加入已醃的豬頸肉拌勻，將袋內的空氣推出後打結，放入雪櫃醃1天。(最少要醃6小時)

5.     氣炸前1小時，從雪櫃取出，置室溫。

 

6.     氣炸鍋煎碟，噴少油，將豬頸肉平放(把香料盡量刮走)，用180度焗8分鐘，轉200度焗5-6分至熟(途中抽出視察是否過濃)，取出待5分鐘，切片上碟。

沾汁 ﹕

1.     芫茜洗淨，用食水加少許鹽浸15-20分鐘。抹乾水份，剪碎，備用。

2.     酸柑仔洗淨，榨出汁液，用篩隔汁(大約有2湯匙)。

3.     椰糖切碎 (我先切約2湯匙)，加入熱水拌至糖溶。

4.     將椰糖水遂少加入酸柑汁內，調至合自己味道。

5.     加入魚露，由1/2茶匙開始，調至合自己味道。加入芫茜，即成。

 

溫馨提示 ﹕

-         不同牌子的調味料，味度不一，自行試味。

-         豬頸肉的油份較多，氣炸時可能會霧出白煙，抽出焗盤再推回，繼續焗就可以。

-         留意﹕由於我分兩轉焗，焗第二轉時溫度已後高，所以第二轉全程用180度焗已經有我想要的顏色。