星期六晚已將三件豬鞍扒放雪櫃上格解凍，星期日食完早餐就醃定，準備做晚餐。
醃好後，我就攪衞生，攪到一半，老爺話順便執下小姐間房啦，D公仔堆到想開下窗都唔得。我簡直踏落個洞到，一執就執到五六點，腰骨都痛。中場兩點幾都係食外賣，何況晚餐呢，邊有體力去煮(成機偷下懶😜)
由於琴晚無煮，今日就唔洗買餸......
鹽麴煎焗豬鞍扒
材料 ﹕
豬鞍扒 3塊
鹽麴 2湯匙
急凍小椰菜 適量
三色小甜椒 適量
做法 ﹕
1. 豬鞍扒徹底解凍後，用鹽稀釋鹽水浸15分鐘後，沖洗多次，抹乾水份。
2. 把豬鞍放入食物器皿中，加入鹽麴拌勻，醃約2-3小時。
3. 三色椒切成小塊，小椰菜不用清洗，備用。
4. 煎鑊放入少許油，加熱後，放上豬鞍，每邊煎2分鐘後，加入小椰菜，蓋上蓋焗2分鐘後，反轉豬鞍，再焗2分鐘，用义或食物針刺入肉中，如沒有血水，即可取出，放碟上靜置5分鐘。小椰菜繼續留鑊中。
5. 加入三色甜椒，炒片刻，此時鑊中的汁開收，即可關火，把配菜上碟。
好努力下，冷宮的凍肉比我清咗接近九成💪💪，今個周未或周日又可以去上貨。
前晚攞咗包雞下腿放在雪櫃普通格解凍，跟著琴日放工準備晚餐時一併醃定。分開咗兩包，一包放入冷宮，另一包放普通格，留待今日做晚餐。
大少回來時，問我今晚食咩? 我話有尼個焗雞下腿、菜飯同節瓜粟米羮。大少話你不如加多隻燶邊太陽蛋比我。
自家食譜 :
醬燒雞下腿(氣炸鍋)
材料 ﹕
雞下腿 1000克(約11-12隻)
蜜糖 適量 (燒野食用那種)
醃料 ﹕
紹酒 1湯匙
胡椒粉 少許
原味蒜粉 ½茶匙
义燒醬 2湯匙
柱侯醬 2湯匙
做法 ﹕
1. 雞腿解凍後，用淡鹽水浸20分鐘，抹乾水份。
2. 將雞腿放入食物器皿中，先將醃料內的紹酒加入拌勻後，加入胡椒粉及蒜粉拌勻，之用义將每隻雞腿刺下，以便入味。再將义燒醬及柱侯醬加入拌勻，再用义將每隻雞腿刺下，分開每餐可食份量，放入保鮮袋內，封好口放入雪櫃，最好醃一晚。
3.焗前放室溫1小時。
4.氣炸鍋鋪上牛油紙，噴少許油，將雞腿平放好，用180度焗15分鐘，取出反轉再焗7分鐘，用义刺下無血水出，就掃上蜜糖，再焗2分鐘即成。
同場加映 : 燶邊太陽蛋、菜飯、節瓜粟米羮
清儲量的晚餐 ﹕芝士茄汁沙甸魚蝴蝶粉
靈感來自上星期在安全島，工人姐姐用洋葱煮沙甸魚比皇太后同佢自己做午餐。
既然我都有罐沙甸魚，天氣又咁熱，都係唔想食飯，不如照姐姐咁做，再加D芝士碎(雪櫃有存貨)，加埋蝴蝶粉落去，又攪掂一餐
自家食譜 ﹕芝士茄汁沙甸魚蝴蝶粉
材料 ﹕
茄汁沙甸魚(大) 1罐
洋葱 1個
蝴蝶粉 2碗
無鹽牛油 10克
Mozzarella芝士碎 ½碗
車打芝士粉 適量
調味 ﹕
黑椒碎 適量
做法 ﹕
1. 煲滾適量的水，加入½茶匙鹽及少許油，將蝴蝶粉放入，依包裝指示時間煮淋，隔水備用。我會留起半碗煮粉的水，以備粉太乾時可以用。
2. 洋葱去衣，洗淨切幼條。
3. 沙甸魚取出放碗中(汁留用)，用义將魚略為壓碎，備用。
4. 熱鑊，下少許油，油熱後加入洋葱、牛油及少許鹽，炒至洋葱轉透明色。
5. 加入沙甸魚炒勻，加入黑椒碎炒勻，下芝士碎及蝴蝶粉炒勻，再加入罐中的汁炒勻，試味上碟，灑上適量芝士粉，即成。
備註 ﹕
- 蝴蝶粉，可因個人喜好而轉換其他粉或飯。
- 芝士碎，可改換成芝士片。因為我有存貨，隨手用。
## 其實食譜只係一個參考，所有食材都可因個人喜好而變。正所謂”窮則變、變則通”
