蝦乾肉片煲仔飯

自從有非洲豬瘟後，已經無買新鮮豬肉，習慣咗買凍肉。在經濟還許可下，我都會選D質數好而價錢適合的肉來食。
在上兩星期透過網上訂購，買夠金額就會送到家門口，非常方便。今晚用包豬柳整煲仔飯，好"淋"，唔會有豬臊味。獨立包裝，300克一包，但價錢唔記得，好似三四十元。仲有今日用Lock n Lock Zen 鍋黎煲飯，兩三年前買咗兩套(大 + 中)，其中一套送比在加拿大的姨甥仔，佢都好鍾意煮野食同買廚具，還記得早幾年過去探佢，適逢加拿大150周年國慶，佢仲淘毒我一起買個LC特別版的鍋，起初都有D衝動，但想想下，返到香港，邊個幫我搬(當時未知老爺有無時間接我機)，咁重，都是放棄............

食譜 ﹕蝦乾肉片煲仔飯 ( 2-3人份量)

材料 ﹕

急凍豬柳          300克

蝦乾                    適量

米                       1.5杯

清水/浸蝦乾水  1.5杯 (視乎米受水的程度調節)

葱粒                    適量

豉油                    適量

醃料 ﹕

胡椒粉                少許

鹽                   1/4茶匙

黃糖               1/2茶匙

紹酒               1/2茶匙

生抽               1.5茶匙

蠔油                  1茶匙

生粉               1/2湯匙   

油                      1茶匙(後下)

做法 ﹕ 

1.  米洗淨，用清水浸約30分鐘。

2.  豬柳解凍後，洗淨抹乾水份，切片，加入醃料拌勻，醃約15-20分鐘。

3.  蝦乾洗淨，浸片刻，隔乾水份，水留用。

4.  將浸過的米，隔水後放入煲內，注入浸蝦乾的水，如不足加入清水。

5.  用中火邊煮邊攪拌至水滾起，加上煲蓋煮約2-3分鐘。

6.  飯差不多收水時，鋪上肉片及蝦乾，蓋上蓋，繼續用中火煮約10分鐘至肉熟，熄火焗約10分鐘，加上葱花及淋上適量豉油焗1分鐘，即成。

涼拌皮蛋豆腐

尼兩日暖咗好多，在屋企做家務都出汗，但又不至於大汗浹背。總是想食D易入口的食物，豆腐是其中的選擇。

食譜 ﹕涼拌皮蛋豆腐

材料 ﹕

蒸煮豆腐       1盒(大)

皮蛋               1隻

辣炸菜           適量

葱花               適量

汁料 ﹕

黃糖                1湯匙

熱水             1/2湯匙

生抽                1湯匙

蠔油                1湯匙

麻油             1/4茶匙

做法 ﹕

1. 豆腐脫盒放碟上，用熱滾水輕輕過水，放回雪櫃，備用。

2. 皮蛋去壳，用凍滾水沖洗，切粒，備用。

3. 辣炸菜用熱水浸片刻，切粒，備用。

4. 準備汁料，黃糖加入熱水拌勻至糖溶解，加入其他材料拌勻，靜置。

5. 取出豆腐，小心倒去水，再用廚房紙印乾水份，依次先放炸菜粒、皮蛋及葱粒在豆腐面，再張汁料淋在豆腐邊，即可進食。

滋潤雙梨蘋果水

前年去俄羅斯，經杜拜機場買咗一盒椰棗，舊年去西班牙，途中買咗包無花果。

而家真是大派用場，因為我勤力咗，每星期最少一次煲下湯或涼水糖水等。

大家加油~~~~~

食譜 ﹕蘋果雪梨水

材料 ﹕ 

富士果     2個

鴨咀梨     3個

雪梨乾   10片(約)

椰棗         4粒

無花果     4粒

南北杏     1湯匙

清水         適量

做法 ﹕

1. 雪梨乾、南北杏洗淨，用清水浸片刻，備用。

2. 椰棗、無花果洗淨，備用。富士果、鴨咀梨洗淨，去芯去蒂。

3. 煲內注入適量清水，把全部材料放入，大火煲滾，轉小火煲1.5小時，即成。

柚子蜜牛仔骨

以往牛肉類，好少在我家中出現，因同住的老人家宗教信仰。現在她不同住，現在幾時都可以入饌。
今日就揀咗牛仔骨配柚子蜜，味道其實都好夾。今次又出動Happycall雙面鑊。

食譜 ﹕柚子蜜牛仔骨

材料 ﹕
牛仔骨              4條(約450-500克)
蒜茸               1茶匙
薑粒            1/2茶匙
柚子蜜           2湯匙
熱滾水           1湯匙

醃料 ﹕
日式燒肉汁   3湯匙
糖                1/2茶匙
胡椒粉             少許

做法 ﹕
1. 牛仔骨解凍後，洗淨抹乾水份，去走部分肥膏後，每條切開三件。
2. 把牛仔骨放入器皿中，加入蒜茸、薑粒及調味拌勻，醃約30分鐘。
3. 柚子蜜同熱水拌勻，備用。
4. 鑊中燒熱約1茶匙油，將牛仔骨排上。

5. 用中火煎至兩面金黃色，取起。汁留鑊轉慢火，加入柚子蜜煮至滾起，將煎好牛仔骨回鑊，蓋上鑊蓋焗1分鐘，快手兜勻，即可上碟。