土魷馬蹄蒸肉餅 (Miele)

有兩餸好耐無食過，分別是土魷蒸肉餅同清蒸桂花魚，於是今就一門四傑(蒸飯、蒸肉餅、蒸魚、蒸菜)放晒入蒸爐，攪掂一餐😂

食譜 : 土魷蒸肉餅

材料 ﹕ 

免治豬肉                      300克

 (我用西班牙免治豬肉，一包剛好。或用新鮮 : 瘦肉6兩、肥肉2兩，自己剁)

土魷                                  1隻 (今次比較大隻，約50克)

馬蹄                                  6粒 (預多一至兩粒，有時去皮後裏爛)

醃料 ﹕ 

胡椒粉               少許

紹酒              1/4茶匙

調味 ﹕ (1)

胡椒粉             少許

鹽                1/4茶匙

糖                   1茶匙

生抽               1茶匙

蠔油               1茶匙

紹酒               1茶匙

調味 : (2)

燕麥               3湯匙

水                   1湯匙

調味 : (3)

油                   1茶匙

做法 ﹕

1. 土魷洗淨，用清水浸至軟身。去衣及軟骨後切粒，加入醃料拌勻，備用。

2. 馬蹄去皮，用刀拍開，再刴成細粒，備用。

3. 免治豬肉洗淨，置入深碗中，加入土魷及調味(1)拌勻。

4. 加入馬蹄及調味(2)，順一方向攪至燕麥溶入肉餅中，最後加入調味(3)拌勻。

5. 轉入蒸碟上，輕輕抹平，放入蒸爐用100度蒸20分鐘，即成。(如用明火，水滾用大火蒸20分鐘)

美國桶蠔豆腐煲

熱起嚟，我就無心機煮食。所以近排真係少煮，就算煮都係簡簡單單，唔好攪到個人都熱埋。
又嚟一煲過，加個上湯肉片伊麵算數。

食譜 ﹕美國桶蠔豆腐煲

材料 ﹕

美國桶蠔              1杯

百福板豆腐          1盒

葱                          2棵（切短度）

薑                          5片

蒜茸                  1茶匙

紹酒               1/2湯匙

醃料：

胡椒粉                少許

生粉                  1茶匙

調味料：

蠔油                  2茶匙

生抽                  1茶匙

老抽                  1茶匙

糖                   1/2茶匙

生粉                  1茶匙

水                      4湯匙

做法：

1. 將蠔放入筲箕中，加兩湯匙生粉輕輕拌勻，靜置10分鐘。

2. 注入清水在深碗中，將蠔放入，用浸洗方法幾次，水清就可，不要用水沖洗，免沖爛蠔身。隔水備用。
3. 熱滾適量水，將蠔放入，水再滾起時，即取出。抹乾水分，加入醃料拌勻，備用。
4. 豆腐切件，抺乾水份，煎至兩面金黃，盛起備用。
5. 原鍋下少許油，爆香薑片、葱白及蒜茸，灒入紹酒，將調味加入（調味料不用拌勻，留起碗底的生粉沉澱，作埋芡用）。
6. 除即加入豆腐及蠔，蓋上蓋焗2分鐘，埋芡及加入葱段，即成。

芒果布甸(魚膠粉+稀少糖篇)

今日做完Facial後，行咗鵝頸橋一轉，見到D水仙芒又大又平，忍唔住買咗一份，$60有三大個，個個都有成1kg重。
為滿足老爺口福，揀咗個用最大嚟整布甸，切開顏色比較淺，以為唔甜，但又係ok甜喎。
開好個壇時先知魚膠片唔夠數，立即落街買魚膠粉，好彩我尼頭兩間超巿都收好夜。
因為老爺有血糖高，佢都算忍得口，但有時都會放縱吓。
為咗佢可以食，今次我試用稀少糖嚟做。

今次用咗1.5倍份量，用魚膠粉及稀少糖，但成品只得14杯。等我再試下用番原本份量，睇吓邊方面影響。

☝ 是上次整，原有份量10杯，用魚膠片及普通砂糖。

口感同texture都無分別。

  

個個都大大個

今次用尼個'稀少糖'

香港一天遊

端午節應該食吓糉、游吓水。
今日竟然陪兩個小寶貝(小honey、海綿寶寶)，一齊本地遊。
第一站 ﹕中環嘆個中式早茶
第二站 ﹕搭覽車上太平
第三站 ﹕晚餐食放題
最攪笑係搭覽車上太平山時，原來搭單程覽車，直接行去上車的位置拍八達通就可以😅唔係買票，我哋儍間間等咗半小時，去到買票counter先知😂不過覽車公司都有錯，係指示不清。
小honey，上到覽車就十分興奮，因為佢係第一次搭，沿途嘩嘩聲，又話好靚丫! 表現出小朋友的童真😍

天色尚可，望到安全島

小honey媽媽話上次在堔圳，幫襯過，好好飲。講到咁好，更係要試吓啦。的確又幾好喎，起碼飲到底都有粒粒果肉，唔似得飲兩飲就無晒。可以有回頭幫襯👍

飲完後，沿夏力道入，盧吉道出，行咗一個圈，人唔太多，疏疏落落，所以可除下口罩，吸下新鮮空氣。

 

行咗一個小時多少少，因為我腳傷未完全復原，所以慢咗。小朋友就邊行邊問幾時返屋企、幾時返屋企。兩個小寶實在太少尼類活動。不過值得讚賞係海綿寶寶，時不時就拖著我行，佢知我腳傷未復完。

完成後，在麥記食咗少少嘢(因為book咗5:30pm食放題)，就搭車落銅鑼灣。

今晚六個大人，兩個小寶貝。👆點只食咁少😂😂

只不過無影其他啫

鹹肉糉 鹼水糉

自6月1日正式回復上班後，時間總是覺得少咗😂

上幾個星期前，老爺已經同我講，包D糉。

我第一次包糉係少爺一歲時(因為佢在端午節出世)，皇太后教我。大少廿多歲，我都係包過兩三次。😁

今年我鹹甜合共包咗成30隻，只係食咗2鹹1甜，其他全部送出了。

FRITES Belgium on Tap

今年的母親節同父親節飯夾埋一餐食，小姐星期一通知話星期四食飯囉，四個都OK就即刻訂位。
今次係小姐楝餐廳，大少比錢。因為我母親節的花、老爺的iPhone 11 pro，小姐一個承擔，所以佢話餐飯要細佬出。
今晚揀在係炮台山分店食，小姐主力推介是食青口。所以落咗1kg，分兩味。還有order其他。完成落單後，待應話我們點了好多，會唔會CUT走D，但老爺話唔洗啦，都唔係好多。待應都好好，話不如將部分配菜改沙律菜好唔好，我哋當然話好啦。

洋葱湯 : 湯上面的法包，有一層芝士，夾埋一齊食非常之美味

三文魚他他 ﹕ 美味

忌廉汁青口 ﹕ 未黎食時，小姐已經同我咗好多好多次，佢係唔鍾意食青口，但尼間餐廳令佢改變了......

沙叻汁 ﹕ 兩種唔同食法，一樣好味。

Super Protein Salad : 全晚最約的一道，最主要係個汁問題

唔記得大少落單時，order西冷定安格斯牛扒 ﹕ 外脆內軟，多汁又有肉香，又係非常美味

Ribs : 個人欣賞個炸蕃薯條多過個骨。