瑤柱臘味蘿蔔糕

唔覺唔覺寫BLOG差不多一年，
雖然唔係日日寫，
記錄下都係好O既，
間唔中睇番回憶下😍
今日大年初七，
人人生日，
祝大家 ﹕
身體健康 !
事事如意 !
疫情快快消失 !

過去兩個月都忙，回想番都唔知自己忙D咩嘢，總知就忙啦😁

農曆前年放咗兩日假，用一日嚟蒸糕BELL，皆因接咗二家夫的order。

食譜 ﹕ 瑤柱臘味蘿蔔糕
份量 ﹕    圓型一斤裝膠盒 _ 2個
             長型膠盒(相中的尺寸) _ 8盒

材料 ﹕
蘿蔔 (已去皮計)        3800-3900克 
臘腸                                           4條
臘肉                                       300克 (約1/2條)
蝦米                                         40克
乾瑤柱                                     50克
粘米粉                                   500克
澄麵粉                                     50克
鷹粟粉                                     50克
水                                           940毫升 (包括浸完瑤柱、蝦米的水)
熟油                                         適量
臘味調味 ﹕
紹酒                                       1湯匙
蘿蔔調味 ﹕
冰糖                                          1粒 (約20克)
調味 ﹕
鹽                                          1湯匙
糖                                       1.5湯匙
雞粉                                      1茶匙
胡椒粉                                  2茶匙

做法 ﹕
1.    早一日，將乾瑤柱洗淨，置器皿中，加入清水(大約過兩粒瑤柱的高度)，蓋好放雪櫃浸一晚，備用。
2.    第二日取出瑤柱隔水，水留用，瑤柱拆絲﹕放砧板上，菜刀放瑤柱上，拉一下，瑤柱已散開。蝦米洗淨，用過面水浸軟，如大隻稍為切碎。浸蝦米水，留用。
3.    煲滾適量熱水，把臘腸及臘肉放入水中，關火，浸5分鐘，取出沖洗乾淨。
4.    臘腸去衣，切粒。臘肉去皮及軟骨(如有)，切粒。備用。    
5.    蘿蔔切去頭及去皮(削至見到透明的肉身即可)，一半刨絲、一半切粗條。備用。

6.    燒熱鑊，不用加油，把臘腸及臘肉加入，爆出油份(臘腸及臘肉變成令身)，下瑤柱及蝦米炒勻，灒下紹酒，炒至香味散出，盛起，備用。

7.    原鑊放入蘿蔔條、水(包括浸瑤柱、蝦米及隔出蘿蔔的水)，加蓋用中火煮約15分鐘。
8.    蘿蔔條開始轉透明色，不用關火，先取起約 2/3的蘿蔔條，把蘿蔔絲及冰糖加入，把取起的蘿蔔條回鑊，加蓋，用大火煮滾，再轉中火煮10分鐘左右至蘿蔔軟身，關火。

9.    隔出煮蘿蔔水，量出 940 毫升(如不足加清水)，待水稍為暖，加入粘米粉、澄麵粉、鷹粟粉，拌勻至沒有粉粒，備用。

10.    蘿蔔放回鑊中，加入粉漿拌勻，再加入調味拌勻。

11.    開最細火，邊拌邊加熱至混合(粉漿已沾在蘿蔔上，即關火，加入已炒的瑤柱臘味拌勻，備用。

12.    糕模先塗油，把蘿蔔漿加入，抹平，置入蒸爐用100度蒸1小時45分鐘，用筷子取出而沒有粉漿即成。
13.    取出的糕，如面有倒汗即倒走，待稍為涼，糕面掃上適量熟油。
14.    糕置涼後或雪一晚，切件煎香，即可食用。
備註 ﹕
1.    蘿蔔去皮要刨深少少，要見到透明的肉才可，否則可能會有苦澀味。所以份量要預多D。
2.    喜歡有蘿蔔的口感，將份量一半刨絲，一半切條。如果全部刨絲，煮蘿蔔時，蘿蔔、冰糖及水一併置入鑊中，煮滾後用中火煮約10-15分鐘 ，蘿蔔軟身即可。
3.    如明火蒸，時間與蒸爐一樣，但要留意加水。開蓋加水後，緊記蓋要抹乾水份，免水倒在糕面。
4.    蒸好的糕，熱時會軟身，放涼後會變得結實，這時可切件。
5.    瑤柱臘味的材料可按個人喜愛加減。